Úkimet 2020 jyly Dýbaıdaǵy Ekspo kórmesine qatysý shyǵyndaryn qaıta qaraýy múmkin, – dep habarlaıdy Tengrinews.kz.

Bul máseleni arnaıy komısıa zerdelemek. Onda kórmeniń qajetigi men elge ınvestısıa tartýǵa qanshalyqty sep bolatyny talqylanady.

"Eger komısıa bul shyǵyndardyń tıimdi ekenin dáleldeı almasa, onda durys sheshim qabyldanady. Jalpy, biz úshin mańyzdysy ınvestısıa kózi», – dedi Ulttyq ekonomıka mınıstri Rýslan Dálenov Dýbaıda ótetin kórmege qatysý úshin qarajatty qaıta qaraý týraly suraqqa jaýap bere otyryp.

Qazaqstannyń 2020 jyly EKSPO kórmesine qatysatynyn BAÁ-niń Saýda mınıstrligi maquldaýy qajet.

Kórmege Qazaqstan 9 mıllıard teńge jumsaıdy.

Qazaqstan pavılony kórmedegi eń úlken ýchaskelerdiń biri bolmaq. Onyń jalpy aýdany 3420 sharshy metr.

Expo 2020 – Dýbaı qalasynda (BAÁ) ótetin búkilálemdik kórme. Kórmeni ótkizý orny 2013 jylǵy 27 qarashada Parıjdegi Halyqaralyq kórme búrosynyń Bas assambleıasynda anyqtaldy. Kórme 2020 jyldyń 20 qazany men 2021 jyldyń 10 sáýiri aralyǵynda ótedi.

Aıaýlym Shopan