Elordada búdjet qarjysyn jymqyrdy degen aıyp taǵylǵan burynǵy Energetıka vıse-mınıstrlerine qatysty kezekti sot otyrysy ótti, dep habarlaıdy «Habar 24».

Búgin negizgi kýágerlerdiń birinen jaýap alyndy. Sondaı-aq proses barysynda 2017 jyly burynǵy vıse-mınıstrdiń kabınetinde túsirilgen vıdeo kórsetildi

Energetıka mınıstrliginiń burynǵy sarapshysy Nazgúl Alımsýrına proseske qatysýshylardyń suraqtaryna eki kún boıy jaýap berdi. Ol atalǵan mınıstrlikke 2015 jyly kelip, eki jyldan soń Shýchınsk-Býrabaı demalys aımaǵyndaǵy Qarasý ózenin tazartý jónindegi jobaǵa bekitilipti. Onyń aıtýynsha, 2017 jyldyń naýryz aıynda tehnıkalyq baqylaýǵa qatysty jarıalanǵan konkýrsta mınıstrlik basshylyǵynan «Stroııntegrasıa» kompanıasy jeńip shyǵýy kerek» degen nusqaý berilgen kórinedi. Sondaı-aq kýáger konkýrstyq komısıanyń tóraǵasy Ǵanı Sádibekov ekenin atap ótti. Budan bólek, memlekettik aıyptaýshylar 2017 jyldyń shildesinde burynǵy vıse-mınıstrdiń kabınetinde túsirilgen vıdeoǵa nazar aýdardy.

Burynǵy vıse-mınıstr men merdiger kompanıa dırektorynyń áńgimesine sot aldynda jaýap bergen Nazgúl Alımsýrına sebep boldy. Ol tólemdi keshiktirgen kórinedi. Sot otyrysynda memlekettik aıyptalýshylar osy máselege nazar aýdarǵan soń burynǵy vıse-mınıstr bul jaıtqa qatysty túsinik berdi.

Ǵanı Sádibekovke «vıse-mınıstr kezinde Qarasý ózenindegi tazartý jumsystarynyń baǵasyn 5 mıllıard teńgeden 7,5 mıllıardqa deıin negizsiz kóterdi» degen aıyp taǵylyp otyr. «Sondaı-aq ol konkýrstyq komısıany basqaryp turǵanda «Stroııntegrasıa» kompanıasyna búıregi burǵan», – deıdi aıyptaýshylar.