Bıyldan bastap belgili bir sanattaǵy azamattar stomatologıalyq kómekke eldegi kez kelgen emdeý uıymy arqyly qol jetkize alady. Buǵan qańtardan bastap engizilgen mindetti áleýmettik medısınalyq saqtandyrý júıesi múmkindik berip otyr.

«Áleýmettik medısınalyq saqtandyrý qory» KEAQ Almaty qalalyq fılıaly dırektory Nurlybek Qabdyqaparovtyń aıtýynsha, 2020 jyldan bastap stomatologıalyq qyzmet aqysyn tóleý sqemasy ózgerdi. Buryn qyzmet aqysy konsýltatıvtik-dıagnostıkalyq qyzmet kórsetetin klınıkaǵa tikeleı aýdarylatyn bolsa, bıyldan bastap emhanalar arqyly tólenedi. Ol úshin emdeý uıymdary arasynda qosymsha kelisimshart bekitiledi.

– Saqtandyrý engizilgenge deıin stomatologıalyq kómek tek pasıenttiń tirkelgen emhanasy arqyly ǵana kórsetiletin. Jańa júıeniń arqasynda atalǵan sanattaǵy azamattar bul qyzmetti elimizdiń kez-kelgen jerinde paıdalana alady. Mysaly, qańtar aıynda almatylyq pasıentterge Mańǵystaý, Aqtóbe, Jambyl, Almaty oblystarynyń, Nur-Sultan jáne Shymkent qalalarynyń emdeý mekemelerinde stomatologıalyq qyzmetter kórsetilgen. Iaǵnı, pasıent tisin qaı jerde emdetse, aqsha sol klınıkaǵa túsedi, – dedi Nurlybek Qabdyqaparov.

MSQ qalalyq fılıaly málimetine súıensek, bıyldan bastap azamattardyń jekelegen sanattary, dálirek aıtqanda, 18 jasqa deıingi balalar men júkti áıelder ambýlatorıa deńgeıindegi stomatologıalyq kómekti saqtandyrý paketi arqyly ala alady. Olar: tisti jansyzdandyrý, plomba salý, terapevtiń qabyldaýy, pýlpıt pen perıodontıtti emdeý, gıpoplazıa men flúoroz saldarynan anatomıalyq pishini buzylǵan tisti tolyq qalpyna keltirý syndy taǵy da basqa qyzmetterdi paıdalana alady. Sonymen qatar, tisti juldyrý, til men erin júgenshigindegi aqaýdy joıý, jaqty rentgenge túsirý, anestezıa syndy qyzmetter de osy paket sheńberinde kórsetiledi.

Al, shuǵyl stomatologıalyq kómek burynǵysha memleket tarapynan kepildendirilgen tegin medısınalyq kómek paketinde qaldyryldy. Shuǵyl kómekke: 18 jasqa deıingi balalar, júkti áıelder, Uly Otan soǵysynyń qatysýshylary, 1,2,3 toptaǵy múgedekter, «Altyn alqa», «Kúmis alqa» ıelengen kópbalaly analar, ataýly áleýmettik kómek alýshylar, jasyna qaraı zeınetke shyqqan zeınetkerler, juqpaly, áleýmettik mańyzy bar aýrýlar men qorshaǵan ortaǵa qaýip tóndiretin syrqattarǵa shaldyqqan pasıentter júgine alady. Mysaly, hırýrgtiń qabyldaýy, tisti julý, absesti ashyp tazartý, odontegendi isikti kesip alyp tastaý, alveolıtti emdeý, tis tamyry nevrıtin emdeý, aýyz qýysyndaǵy jumsaq tinderdi kesip alyp tastaý, jaq-bet súıegindegi jaralardy emdeý t.b. qyzmetter tegin kórsetiledi. Sondaı-aq, jaq-bet súıegi aqaýymen týǵan nárestelerge arnalǵan ortodontıalyq kómek túrleri de memlekettik tapsyrys sheńberinde kórsetiledi.

Jalpy, qazir Almaty qalasynda 75 bastapqy medısınalyq-sanıtarlyq kómek kórsetetin 75 klınıka (emhana) tirkelgen. Onyń 23-i stomatologıalyq kómek kórsetedi. Qosymsha kelisimshart negizinde stomatologıalyq qyzmet kórsetetin klınıkalar sany – 9.

– Jańa júıe pasıenttiń stomatologıalyq klınıkany tańdaýyna múmkindik berip otyr. Biraq azamattardyń kóp jaǵdaıda óz quqyqtaryn bilmeı jatatyny da jasyryn emes. Ókinishke oraı, pasıentterdiń stomatologıalyq klınıkany tańdaý quqyǵyn barlyq emhanalar birdeı saqtaı bermeıdi. Sebebi, pasıent tańdaýdy tirkelgen emhanasy arqyly jasaıdy, qyzmet aqysy da sol emhana arqyly tólenedi. Sondyqtan biz pasıent quqyǵyn qorǵaý maqsatynda barlyq klınıkalarmen jan-jaqty jumys istep jatyrmyz, – dep qorytty fılıal basshysy.

Medısınalyq kómek kórsetý barysynda quqyǵy buzylǵan turǵyndar Medısınalyq saqtandyrý qorynyń 1406 baılanys nómirine shaǵymdana alady.

«Áleýmettik medısınalyq saqtandyrý qory»

KEAQ Almaty qalalyq fılıalynyń

baspasóz qyzmeti