«Nur Otan» partıasy tóraǵasynyń Birinshi orynbasary Baýyrjan Baıbek saıası uıymnyń aımaqtardy aralaý josparynyń aıasynda Jambyl oblysyna arnaıy jumys saparymen kelip, óńirdiń Jýaly aýdany men Taraz qalasynda bolyp, óńirdiń kásipker áıelderimen, zıaly tulǵalarymen, etno-mádenı birlestikter ókilderimen jáne bilim salasynyń qyzmetkerlerimen kezdesti.

Zıalylarmen bolǵan kezdesýdi oblys ákimi Berdibek Saparbaev ashyp, júrgizip otyrdy. Baýyrjan Baıbek zıaly qaýym ókilderimen emen-jarqyn suhbat quryp, sapardyń maqsaty, el jaıy, saıasat barysy, ıdeologıalyq jumystar baǵdary, rýhanıat pen mádenı ahýal, jastar tárbıesi sekildi keleli jáıtterge keńinen toqtaldy. Ásirese, Elbasy bastamasymen partıa tarapynan engizilip jatqan jańalyqtar – praımerız ben óńirlik damý baǵdarlamalary, partıanyń negizgi qundylyqtary men aldaǵy mindetteri týraly jan-jaqty aıtyp berdi.

«Ózderińiz bilesizder, jyldyń basynan bastap Elbasy tapsyrmasymen óńirlerdi aralaı bastadyq. Mundaǵy maqsatymyz – jergilikti jerlerde bolyp, turǵyndarmen, zıalylarmen, el aǵalarymen kezdesý, pikirlerin bilip, usynystaryn tyńdap, túıtkildi máselelerdi birlese talqylaý, sheshý joldaryn qarastyrý. Elbasy aıtqandaı, partıanyń úsh maqsaty bar. Ol, birinshiden, halyqtyń pikirin bilý, halyqtyń sózin sóıleý, ony bılikke jetkizý. Ekinshiden, bılik tarapynan jasalyp jatqan dúnıelerdi halyqqa qarapaıym tilmen túsindirip aıtý. Úshinshiden, bilim men densaýlyq salasynyń sapasyna mán berý.
Bizdiń saıası ustanymymyz – sentrızm. Ol – orta jolmen júrý, ońǵa,solǵa tartpaý. Bizdiń negizgi qundylyqtarymyz – adam, onyń bostandyǵy, Táýelsizdik, yntymaqshyldyq, otbasy, dástúr, rýhanıat jáne zańnyń ústemdigi. Eń bastysy, biz qabyldanǵan zańdardy oryndaýymyz kerek.
Partıa elimizdegi problemalardy bilip qana qoımaı, olardy sheshý úshin qajetti qadamdar jasamaq. Olardyń birinshisi – praımerız, ıaǵnı ishki partıalyq irikteý ótkizý arqyly qolynan is keletin, bilimdi, elge sózi ótimdi, adal da abyroıly azamattardyń bılikke, ókiletti organdarǵa kelýine yqpal etý bolsa, ekinshisi – árbir óńirdiń erekshelikterin, naqty qajettilikterin eskere otyryp, arnaıy damý baǵdarlamasyn ázirleý. Sondyqtan qazir bes jyldyq osyndaı baǵdarlamalardy talqylap jatyrmyz», - dedi Baýyrjan Baıbek.

Zıaly qaýym ókilderi de ózderin tolǵandyryp júrgen saýaldaryn qoıyp, usynystary men oılaryn búkpesiz ortaǵa saldy. Jıynǵa qatysýshylar tarapynan alǵash bolyp sóz alǵan Masat Berik eldiń táýelsizdik alǵanyna 30 jylǵa jýyq ýaqyt bolsa da memlekettik tildiń óz deńgeıinde paıdalanylmaı kele jatqanyna alańdaýshylyǵyn bildirip, Til týraly zań men tildi damytýǵa arnalǵan memlekettik baǵdarlamanyń oryndalýyna basa mán berýdi, partıa tarapynan baqylaýdy qolǵa alýdy usyndy. Al ardager ustaz Bátes Egemberdıeva jýyrda qabyldanǵan «Pedagog mártebesi týraly» Zań jaıynda áńgime órbitip, bilim salasyn damytý týraly oılarymen bólisti. Sondaı-aq «Jambyl oblystyq M.Qashǵarı atyndaǵy uıǵyr etno-mádenı birlestigi» qoǵamdyq birlestiginiń tóraıymy Mýhabbat Turdıeva patrıotızmdi nasıhattaý, barsha ult ókilderiniń memlekettik tildi meńgerýi, el halqynyń turaqtylyǵy men birligin nyǵaıtý, etnosaralyq qatynastardy úılestirý jaıyn qozǵasa, Sh.Murtaza atyndaǵy «Rýhanıat jáne tarıhtaný» ortalyǵy dırektorynyń orynbasary Ahmetjan Ózbekov qazaqtyń tól óneri – aıtysqa toqtalyp, partıa qoldaýymen ótkizilip jatqan aıtystardy telearnalardan kórsetý, aıtyskerlerge partıa tarapynan júıeli túrde keńester berilip otyrsa degen usynysyn jetkizdi.
Sonymen birge bas qosýda taıaýda oryn alǵan Qordaı oqıǵasy da sóz bolyp, endi osyndaı keleńsizdikterdi boldyrmaýdyń aldyn alý sharalary pysyqtaldy.
Partıa tóraǵasynyń Birinshi orynbasary jurtshylyq kóterip otyrǵan máselelerdiń barlyǵy ázirlenip jatqan óńirdi damytýdyń 5 jyldyq baǵdarlamasyna enetinin, al osy sapar barysynda Qordaıǵa arnaıy baryp, jergilikti jaǵdaımen tanysatynyn jetkizdi. Onyń aıtýynsha, halyqtyń aýyzbirshiligi men qoǵamdyq kelisim ǵana – elimizdiń ósip-órkendeýi men tabysty damýynyń berik negizi.
Sapar aıasynda partıanyń kezekten tys konferensıasy ótip, onyń qorytyndysy boıynsha oblysqa jýyrda ákim bolyp taǵaıyndalǵan Berdibek Saparbaev «Nur Otan» partıasy Jambyl oblystyq fılıalynyń tóraǵasy bolyp saılandy.

Eske sala keteıik, taıaýda, ıaǵnı 5 naýryzda Elbasynyń tóraǵalyǵymen ótken «Nur Otan» partıasynyń Saıası keńesi Búrosynyń otyrysynda 30 naýryzdan 16 mamyrǵa deıin elimizde ashyq ishki partıalyq irikteý - praımerız ótkizý týraly sheshim qabyldandy.