Almaty qalasynyń ákimi Baqytjan Saǵyntaevtyń tapsyrmasyna sáıkes shahar basshysynyń orynbasary Erjan Babaqumarov bastaǵan jumys toby medısına qyzmetkerleriniń karantın kezeńinde ýaqytsha turyp jatqan jerindegi turmys jaǵdaılaryn tekserdi.

Jumys tobynyń quramynda Nur Otan partıasy Almaty qalalyq fılıaly tóraǵasynyń birinshi orynbasary S. Kankýrov, qalalyq Qoǵamdyq densaýlyq basqarmasy basshysynyń orynbasary A. Bısenbaeva men Taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary N. Dágıleva, Sybaılas jemqorlyqqa qarsy is-qımyl agenttigi janyndaǵy arnaıy monıtorıńtik top tóraǵasynyń orynbasary, «Jastarǵa jol» qoǵamdyq qorynyń prezıdenti R. Gasanov bar.

Tótenshe jaǵdaı kezinde 3,5 myńǵa jýyq medısına qyzmetkeri óz qalaýlary boıynsha jergilikti búdjettiń qarjylandyrý esebinen 13 qonaq úı kesheni men 11 jataqhanaǵa ornalastyryldy.

Jumys toby 503 medısınalyq qyzmetker turyp jatqan 5 qonaq úı kesheni men 2 jataqhanaǵa bardy. Munda Jedel járdem, Balalar juqpaly aýrýlar men qalalyq juqpaly aýrýlar aýrýhanalarynyń, Psıhıkalyq densaýlyq ortalyǵy men №2 perzenthananyń, №5 qalalyq klınıkalyq aýrýhanasynyń qyzmetkerleri turyp jatyr.

Tekserý barysynda turǵylyqty jerdiń jaǵdaıy, qyzmetkerlerdiń bólmeleri, ondaǵy sanıtarlyq-epıdemıologıalyq qaýipsizdik normalarynyń saqtalýy, ásirese bólmelerdegi dezınfeksıa jumystarynyń der kezinde júrgizilýine erekshe kóńil bólindi. Sondaı-aq jeke qorǵaný men jeke gıgıena quraldarynyń jetkilikti deńgeıde bolýy tekserildi.

«Eń bastysy – turmys jaǵdaıy. Dárigerler men medısına qyzmetkerleri aldyńǵy shepte, ıaǵnı qaýip-qater aımaǵynda jumys isteıdi. Olarǵa yńǵaıly bolý úshin turmysta da, jumysta da durys júıe qalyptastyryldy. Barlyq qaýipsizdik sharalaryn saqtaý mańyzdy», – dep atap ótti E.Babaqumarov.

Qala basshysynyń orynbasary Erjan Babaqumarov medqyzmetkerlerdi sapaly azyq-túlikpen qamtamasyz etý máselesine de toqtaldy. Bul rette COVID-19-ǵa qarsy is-qımylǵa jumyldyrylǵan jáne medısına qyzmetkerlerine jaǵdaı jasaý úshin jan-jaqty qoldaý kórsetýge daıar kásipkerlerdiń róli erekshe atap ótildi. Azyq-túliktiń jetkizilýi men onyń sapasyn baqylaý eriktilerdiń qalalyq shtabymen júzege asyrylady.

Medısına qyzmetkerlerin jumys ornyna deıin jetkizip, qaıta úıine aparý máselesi de pysyqtaldy.

Sapar barysynda Erjan Babaqumarov qonaq úıler men jataqhanalarda ýaqytsha turyp jatqan medqyzmetkerlermen tildesti. Tamaqtaný, jumysqa tasymaldaý boıynsha kórsetiletin qyzmetterdiń sapasy, sonymen qatar jumys oryndaryndaǵy eńbek jaǵdaılary da talqylandy.

«Qazir elimiz qıyn-qystaý kezeńdi bastan keshirýde. Biz, medısına qyzmetkerleri, qolymyzdan kelgenshe aıanbaı jumys isteýdemiz. Almaty ákimdigine berilgen múmkindikter úshin alǵys bildiremiz. Qajet zattardyń barlyǵy bar, bólmeler taza, tamaqtary da jaqsy. Qazirgi ýaqytta dáriger retinde zor jaýapkershilikti sezinemiz. Birlese bul dertti jeńetinimizge senemin», –  dedi balalar juqpaly aýrýlar aýrýhanasynyń rentgenolog-laboranty S. Erkinbekov.

«Eń aldymen bul – bizdiń mindetimiz. Biz halyqtyń densaýlyǵyna jaýaptymyz. Qaýipti indetti jeńý úshin jumysta qaldyq. Barshańyzǵa densaýlyq tileımiz, sondaı-aq basshylyǵymyzǵa jáne qoldaý kórsetkenderge alǵys bildiremiz. Biz aýrýdy jeńemiz», – dedi №2 perzenthananyń aǵa medbıkesi A. Toparova.

«Bizdiń jaǵdaıymyz jaqsy. Taza sý, taza bólme. Munda kúnine eki ýaqyt dezınfeksıa jumystary júrgiziledi. Úsh mezgil tamaqtandyrady. Kólikten bas tartyp, jumysqa jaıaý baramyz. Ákimdik tarapynan barlyq jaǵdaı jasalǵan», – deıdi qalalyq Jedel járdem aýrýhanasynyń gınekologıa bóliminiń meńgerýshisi Q. Jumabaeva.

Tekserý jumystary kezinde TKQSBD ókili barlyq sanıtarlyq-epıdemıologıalyq normalardyń saqtalǵanyn atap ótti.

«Biz qalanyń provızorlyq jáne karantındik stasıonarlarynda jumys isteıtin medısına qyzmetkerleri turatyn qonaq úıler men jataqhanalardy tekserdik. Barlyq qajetti sharalardyń oryndalatynyna kóz jetkizdik», – dedi N. Dágıleva.