Kúne keshe ǵana Elbasy Nursultan Ábishulynyń memlekettik únemdeý týraly aıtqan sózinen keıin Jambyl oblystyq ákimdiginiń apparaty 12 mıllıon 350 myń teńgege kólik satyp alǵany týraly aqparatty rgmedia.kz saıtyna silteme jasaǵan Nur.kz saıty taratqan.
AQSH dollarynyń teńgege shaqqandaǵy búgingi baǵamymen 66 myń dollar turatyn kólik taban astynda kimge, ne úshin qajet bolǵany ázirge belgisiz. Biraq, jaqynda ǵana “Qazaq handyǵynyń 550 jyldyǵyn” atap ótý is-sharalaryn óńirge arnaıy kep, pysyqtap qaıtqan vıse-premer Berdibek Saparbaev toıǵa jumasalatyn qarjyny únemdep, ár tıynyna deıin esep beretindeı etip jumsaýdy qatań tapsyrǵan-dy.
«Qymbat kólikke toıdyń aqshasy jumsalmaǵan da bolar. Alaıda, toı qarsańynda Tarazdy taranǵan qyzdaı etip, kórkeıtýge qarjy birde jetip, birde jetpeı, ár oblys “toıǵa qosqanymyz bolsyn” dep, biri kóshe jóndep, biri saıabaq salyp berip jatqanda qymbat kólikti almaı qoıa tursa da bolar edi ǵoı”, – dep jazady maqala avtory.
Jambyl oblystyq ákimdiginiń apparaty elektrondy memlekettik satyp alý negizinde bergen tapsyrysta kóliktiń minezdemesi aıqyn jazylǵan.
“F kalssty, jaqsy jaraqtalǵan, uzyndyǵy 4,9 m úlken emes, eni 1,7 m, tolyqtaı elektropaketti, ortalyqtandyrylǵan qulyp, ABS,SRS, GÝR, PEP, kondısıoneri…” taǵy basqa tolyp jatqan talaptaryn memlekettik tapsyrystyń lotyna tizbelep shyqqan.
Bul kólikke tapsyrys Memlekettik satyp alý saıtyna Jambyl oblystyq ákimdigi dúısenbi, 3 tamyz kúni saǵat 12.48 de ornalastyrǵan. Al kólikti keshke deıin alyp úlgergen.
“Qarapaıym eldiń aryz-shaǵymyn, ótinishin osyndaı kosmostyq jyldamdyqpen sheship tastasa jambyldyq sheneýnikterge aıtar alǵys kóp bolar edi-aý”, – delingen maqalada.
“Sonymen, “Qazaq handyǵynyń 550 jyldyq toıyn óz deńgeıinde ótkize almasań “basyń ketedi” degen Berdibek Saparbaevtyń qatań “tapsyrmasy” Kárim Kókirekbaevtyń kókireginde qanshalyqty uıalap qalǵanyn bilmeımiz, ázirge tarazdyqtar toıǵa qyzý daıyndyq ústinde. Oblys ákimi K.Kókirekbaevtyń óz sózimen aıtsaq “jumysshylar táýligine 24-25 saǵat jumys isteýde”. Al qymbat kólik kimge, ne úshin alyńdy eken?”, – dep jazady avtor.
Nurzat Toǵjan
