Almaty qalasy Qoǵamdyq densaýlyq basqarmasynyń basshysy Tileýhan Ábildaev koronavırýstyq ınfeksıa juqtyrǵan 119 jaǵdaı tirkelgenin habarlady.

Spıker qazirgi kezde juqpaly aýrýlar stasıonarlarynda 99 naýqas Covid-19-dan emdelip jatqandyǵyn, onyń ishinde tórteýi – balalar ekendigin aıtty.

Osy ýaqytqa deıin koronavırýstyq ınfeksıany juqtyrýdyń jańa úsh jaǵdaıy anyqtalyp otyr. Olardyń bári osy ınfeksıamen aýyrǵan naýqastarmen baılanysta bolyp juqtyrǵan.

Olardyń bireýi 1975 jyly týylǵan er adam bolsa, qalǵandary 1962 jáne 1964 jyly týylǵan áıelder.

Er adamnyń jaı-kúıi ortasha deńgeıde aýyr dep baǵalanýda, tekserip-qaraý kezinde odan pnevmonıa anyqtalǵan. Al áıelderdiń jaı-kúıi – qanaǵattanarlyq, ıaǵnı aýrý aǵymynyń jeńil túri ekeni belgili boldy.

Bularmen baılanysta bolǵan barlyq adamdar karantınge jatqyzyldy.
Búgingi kúni emdeýden shyǵarylǵan naýqastar joq.

Aıta keteıik, megapolıste koronavırýstan emdelip shyqqandardyń jalpy sany – 21 adam.

Al 80 naýqastyń jaı-kúıi qanaǵattanarlyq, 2 eresek adamnyń jaǵdaıy óte aýyr bolsa, 4 naýqastyń hali – aýyr, 13 eresek adamnyń jaı-kúıi ortasha aýyrlyq deńgeıde, aralarynda bir oblys turǵyny bar.

Provızorlyq ortalyqtarda qazir 318 adam bolsa, olardyń 35-i balalar.

Tek keshe ǵana osy provızorlyq ortalyqtardan 203 adam emdeýden shyǵaryldy. Olardyń 44-i balalar. Bulardyń barlyǵy 14 kúndik karantınde bolyp, ınfeksıa juqtyrmaǵandyǵy anyqtalyp, aýrýhanadan shyǵaryldy.

Eskerte keteıik, karantındik oqshaýlaýda qazir 385 azamat bar, onyń ishinde 39-y balalar, al úı karantıninde — 5144 adam otyr.