İndet jaǵadan alyp, el basyna kún týǵan shaqta «Men ne isteı alamyn?» dep qarlyǵashtyń qanatymen sý sepkenindeı kómek berýge yntalanǵan jandar kóp boldy. Máselen, búgingideı syn saǵatta janashyrlyq tanytyp, kópke kómegin kórsetip, qaıyrymdy azamattardyń basyn qosqan kásipker Dáýren Tálipovtyń eren eńbegin erekshe atap ótýge bolady.

«Altyn Júrek» syılyǵynyń ıegeri qaıyrymdylyq jasaýda aldyna jan salmaıdy. Ol bul syılyqqa da meıirimdiligi men adamgershilik qasıeti arqyly kópke kómektese júrip qol jetkizdi. Jaqsylyq jasap, jalpyǵa janashyrlyq tanytyp júrgen baýyrmal azamat «Eger nan satyp alýǵa múmkindigińiz joq bolsa, tegin alyńyz» dep qala turǵyndaryna tegin nan taratty. Karantın kezinde sanıtarlyq bekettegi qyzmetkerlerdi tegin tamaqtandyrdy. Odan bólek, kásipkerdiń demeýshiligimen atqarylyp jatqan is te az emes. Ol qazirgi tańda oblystyń 125 medısına qyzmetkerin túski aspen tegin qamtamasyz etýdi qolǵa alǵan. Kásipker qaýymdastyǵy ókilderiniń halyqqa úndeý jarıalap, indetpen barsha qazaqstandyqty birlese kúresýge shaqyrǵany belgili. Solardyń biri bizdiń keıipkerimiz bolatyn. Osylaı bastalǵan ıgi istiń nátıjesinde qazaqstandyqtardan 10 mıllıon teńgege jýyq qarajat jınaldy. «Kóp túkirse kól» degendeı, halyqtan túsken qarajat qanshama adamnyń ómirin aman alyp qalýǵa septigin tıgizdi.

– Buǵanam qatpaı jatyp, bızneske aralasa bastadym. Ákem men úlken aǵamnan kóp dúnıe úırendim. Kásipkerlikpen aınalysa júrip, kómekke muqtaj jandarǵa qol ushyn sozýdy azamattyq paryzym dep sanaımyn. Saýapty is atqaryp, eldiń batasyn alýǵa degen qulshynysym kún ótken saıyn artyp keledi. Qazir bizdiń  qoǵamnyń tek meıirimge shóldep turǵanyn umytpaıyq. Bul qaıyrymdylyq sharasy bastalǵaly beri jomart júrekti azamattar oǵan atsalysýdan sharshaǵan emes. Kásipker qaýymdastyǵynan 70, al ujymymnan 50 azamat ıgi istiń basy-qasynda júr. Mynadaı aýyr indet taraǵan kezde jaıbaraqat otyrǵan adamdy kórmedim. «Qolymnan eshteńe kelmeıdi» degen adamnyń ózi biz ashqan qorǵa aqsha aýdardy. Másele qarajattyń az, kóptiginde emes. Eń bastysy,

halyqtyń nıeti men peıili. Osy betimizden taımasaq, kóńilimizdi kir shalmasa biz bul dertti jeńip, burynǵy jaıma-shýaq kúnimizge qaıta oralamyz. Biraq osy jolda sharshamaı, talmaı eńbek etýimiz kerek. Aýrýhanaǵa túsip, jaǵdaıdy óz kózimmen kórgende qatty tańǵaldym. Aq halatty jandar damyl tappaı, ár naýqasqa kóńil bólýde. Ómir men ólim arasynda jan alyp, jan berisip kúresken altyn qol dárigerlerdiń erligine bas ıemin. Medısınalyq quraljabdyqtar jetispegendikten qaıǵyly oqıǵalardyń oryn alýy artty. Birden osy olqylyqtyń ornyn toltyrý kerektigin túsindim. Mán-jaıdy halyqqa túsindirip, qarajat jınaý maqsatymen qor ashtyq. Tez arada iske kirispesek naýqastardy qutqaryp qala almaıtynymyzdy túsindim. Bar bolǵany úsh aptanyń ishinde 10 mıllıon teńgege jýyq qarajat jınaldy. Oǵan ókpeni jasandy jeldetetin 79 apparat aldyq. Qazirgi tańda ony oblys aýmaǵyndaǵy barlyq aýrýhanaǵa taratyp berdik. «Shuǵyla» qory ár konsentratorǵa óz shtırh-kodyn ornatyp, óz bazasyna tirkedi. Konsentratordyń qaı aýrýhanada turǵany baqylaýǵa alynǵan. Sondyqtan konsentratorlar jeke adamnyń qolyna berilmeıdi. Tek qana aýrýhanaǵa túsken naýqastarǵa paıdalanylady. Osyndaı jumys atqarýǵa atsalysqan meıirimdi jandarǵa alǵys aıtamyz. Zamanymyz tynysh, elimiz aman bolsyn, – deıdi meıirimdi azamat.

Otyzda orda buzyp, qyryqta qamal alý – árbir qazaq azamatynyń negizgi maqsaty ekenin tilge tıek etken Dáýren Orazǵalıuly óńirdegi kásiptiń damýyna atsalysyp júrgen azamattardyń biri ári biregeıi. Ol kásip bastaǵan jastarǵa jol kórsetip, qoldaý bildirýden sharshamaıdy. Kerisinshe, olarǵa damýdyń dańǵyl jolyn kórsetýge qushtar. Álem moıyndaıtyn qazaq kásipkerleriniń sanyn arttyrý – onyń basty maqsaty. Azamat retinde qoǵamdaǵy jaýapkershiliktiń aýyr júgin arqalap qana qoımaı adamdar arasyndaǵy meıirimdilik seziminiń sónbeýine birkisideı atsalysyp júrgen qazaqtyń jigerli uly Prezıdent Qasym-Jomart Toqaevtyń Jarlyǵymen «Halyq alǵysy» memlekettik medalin ıelendi. Elim dep eńbek etken azamattyń eńbegi aqtaldy. Eń bastysy – janashyr azamatqa halyq rıza.

 Aıdar QALIEV