Oralda 12 jastaǵy qyzdy zorlaǵan pedofılge 2,5 jyl bas bostandyǵyn shekteý jazasy kesildi. Bul týraly KTK habarlady.

Pedofılge eki jarym jyl bas bostandyǵynan shekteý jazasy alqa bıleriniń jasyryn daýys berý arqyly anyqtalǵan.

– Biz sol sheshimdi qabyldaǵan alqa bılerdi kórgimiz keledi. Ol alqa bıler quramyn kim jasaqtaǵan? Olardyń quqyq salasynan habary bar ma? "Qyz jynystyq qatynasqa óz kelisimin berdi" depti. Ol kámeletke tolmaǵan 12 jastaǵy bala! Múndaı jeńildik jasaýdyń arty onsyz da qaptap ketken pedofılderge erkindik beredi. İstiń qaıta qaralýyn talap etemiz, – dedi "Qazaqstan áıelder kúshi" alánsy tóraǵasynyń orynbasary Ázıza Shújeeva.

21 jastaǵy kúdikti Anatolıı Marchenko qylmysyn tolyq moıyndaǵan. Alaıda jynystyq qatynasqa 12 jastaǵy qyz "óz kelisimin berdi" dep aıtty. Osylaısha pedofılge alqa bıleri  2 jarym jylǵa bas bostandyǵyn shekteý jazasyn ǵana beripti. 

Degenmen qoǵam belsendileri munyń shekten shyqqan dúnıe ekenin aıtyp, joǵarǵy sotqa deıin aryzdanǵan. Sýdıa alqa bıleriniń aıtqanynan shyǵýǵa quzyreti joǵyn jetkizdi.

– Sýdıa alqa bıleriniń sheshimine yqpal jasaı almaıdy. Alqa bıleri  bas bostandyǵynan aıyrýǵa "negiz joq" dep sottalýshyǵa bas bostandyǵynan aıyrmaý jazasyn taǵaıyndaýdy ádiletti dep sanady. Úkim zańdy kúshine engen joq, – dedi sýdıa Shara Zaınýllına.