Osydan týra bir apta buryn elimizde «Nur Otan»-nyń partıaishilik irikteýi - praımerızge qatysý úshin ótinishter qabyldaý bastaldy. Partıa Lıderi Nursultan Nazarbaevtyń tapsyrmasymen «Nur Otan» praımerızi elimizdiń partıalyq-saıası damý tarıhynda tuńǵysh ret respýblıkalyq partıaishilik saılaý aýqymynda ótedi.

Partıa Tóraǵasynyń birinshi orynbasary Baýyrjan Baıbek, bul – Elbasynyń bastamasymen qolǵa alynǵan «Senim. Dıalog. Bolashaqqa nyq qadam» partıa jumysyn «qaıta jandandyrý» baǵdarlamasynyń qorytyndy kezeńderiniń biri ekenin aıtqan bolatyn. Praımerızdiń negizgi maqsaty – aldaǵy Májilis pen barlyq deńgeıdegi máslıhat saılaýlaryna partıalyq tizimderdi qalyptastyrý úshin básekeles kúres negizinde jańa kóshbasshylardy aıqyndaý.

Partıa baspasóz qyzmetiniń habarlaýynsha, bir apta ishinde praımerızge qatysýǵa 7000-ǵa jýyq adam ótinish bergen. Olardyń 34%-y – áıelder, onyń ishinde 100-i – kópbalaly ana, . 24%-y – 35 jasqa deıingi jastar. , sondaı-aq 51-i – erekshe qajettiligi bar azamat. Bastaýysh partıa uıymdary arqyly 2419 adam usynylsa, 4496 kandıdat – ózin-ózi usynǵandar.

Solardyń biri - «Temeki tútininen azat Qazaqstan úshin» qoǵamdyq qozǵalysynyń basshysy Jámılá Sadyqova. Áleýmettik jelilerdegi paraqshasynda ol óziniń densaýlyq saqtaý salasyndaǵy bilimin azamattardyń ómir súrý sapasyn jaqsartýǵa paıdalaný úshin praımerızge qatysatynyn aıtty.

«Aıtarym ǵana emes, atqarsam degen isterim de jeterlik. Óz elimde deklaratıvti emes, naqty, sapaly ózgerister jasaǵym keledi. Qazaqstandyqtardyń densaýlyǵyn saqtaý úshin temekige qarsy bastamalar men sharalardy qolǵa alǵanym sıaqty bar kúsh-jigerimdi salyp jumys isteýge, óz úlesimdi qosýǵa daıynmyn», - dep jazdy Jámılá Sadyqova.

Al almatylyq kásipker, qoǵam belsendisi Konstantın Avershın sybaılas jemqorlyq máselesine alańdaýshylyq bildirdi. Onyń pikirinshe, sybaılas jemqorlyq – densaýlyq saqtaý nemese bilim berý júıesindegi kez kelgen olqylyqtyń negizgi sebebi. Sonymen qatar, ol praımerız – qatań básekelestik negizde eń myqty kandıdattardy irikteýge jaǵdaı jasaıtyn erekshe múmkindik ekenin atap ótti.

«Bastaýysh partıa uıymynyń atynan túsesiń be, álde óz-ózińdi usynasyń ba, ol jaǵy mańyzdy emes. Dál qazir eń bastysy – óz qabiletińdi, atqara alatyn isińdi kórsetý. «Nur Otan» partıasyn qaıta jandandyrý júrip jatyr. Bul jaı ǵana aıtyp qoıa salý emes, praımerızge jumys isteýge jáne ózgeris jasaýǵa daıyn adamdar qatysady»,-dep túıdi Konstantın Avershın.

Erekshe qajettiligi bar adamdar úshin qalalyq ortany yńǵaıly etý máselelerin voleıboldan Qazaqstan paralımpıadalyq jastar quramasynyń kapıtany Serik Esmatov kótermek.

«Men múmkindigi shekteýli adammyn, sondyqtan ózim sıaqty jandardyń qandaı qıyndyqtarmen ushyrasatynyn jaqsy bilemin. Osy turǵydan tek týǵan qalamdaǵy emes, búkil Qazaqstandaǵy jaǵdaıdy jaqsartsam degen josparym bar», - dedi sportshy.

Eriktiler lıgasynyń basshysy Aısulý Ernıazova ókildik organdarda jastardyń múddesin bildirýge talpynyp otyr. Aısulýdyń aıtýynsha, partıanyń jastarǵa senim artýy, olarǵa jaýapkershilik júkteıdi.

«Praımerız – eń aldymen jańa tarıhty jasaıtyn jigerli tulǵalar men jańa tolqyn. Men muny partıanyń taktıkalyq jáne strategıalyq durys sheshimi dep esepteımin. Kúres óte qyzyqty básekelestik jaǵdaıda ótedi. Jas býynnyń múddesin kózdeı otyryp, memlekettik jastar saıasatyn basty nazarda ustaımyn. Qandaı ózgeristerdiń jastarǵa keregin jáne qandaı máselelerdiń alańdatatynyn jaqsy bilemin», - dedi kandıdat.

Al jalǵyzbasty analardy qoldaý máselesin Pavlodardan kelgen Jámılá Ernazarova qolǵa almaq.

«Praımerızge qatysýdaǵy maqsatym – pavlodarlyq otbasylarǵa, eń aldymen kámeletke tolmaǵan balalary bar jalǵyzbasty analarǵa odan ári júıeli qoldaý kórsetý», - dedi ol.

Tanymal shoýmen Tursynbek Qabatov ta praımerızge qyzyǵýshylyq tanytyp otyr. Ol Instagram jelisindegi oqyrmandaryna partıaishilik irikteýge qatysqanym jón be degen oı tastap, olardyń pikirlerin surady. Aıta ketý kerek, Tursynbek Qabatov ótken jyldyń qarasha aıynan beri «Nur Otan» partıasynyń múshesi. Onyń bastamasyn kópshilik qoldady.

Bıleýshi partıanyń baspasóz qyzmeti taratqan aqparatqa sáıkes, praımerızge qatysý úshin ótinishti https://primaries.kz/ saıtynda «Praımerız» aqparattyq júıesi arqyly onlaın joldaýǵa nemese aýmaqtyq uıymdastyrý komıtetterine jeke ótinish berýge bolady. Kandıdattardy usyný jáne tirkeý 28 tamyzǵa (qosa eseptegende) deıin jalǵasady.

Partıa qundylyqtaryn ustanatyn jáne saılaý quqyǵy bar kez kelgen azamat úmitker bola alady. Ol úshin praımerızge qatysýshylardy tirkeý merzimi aıaqtalǵanǵa deıin «Nur Otan»-nyń qataryna qosylý kerek.

Praımerız ótkizý, sondaı-aq kandıdattarǵa uıymdastyrýshylyq jáne quqyqtyq qoldaý máseleleri boıynsha "Nur Otan" partıasy 8 (800) 080 4441 arnaıy jedel jelini iske qosty.