Bıylǵy mamyr-shilde aılarynda aldyńǵy jyldardyń sáıkes kezeńine qaraǵanda 24 myń adam artyq qaıtys bolǵan. Olardyń kóbi koronavırýstan kóz jumǵan bolýy múmkin. Mundaı boljamdy statısıkalyq derekterdi negizge alǵan Ál-Farabı atyndaǵy Qazaq ulttyq ýnıversıteti Densaýlyq ǵylymı-zertteý ınstıtýtynyń dırektory Qaırat Davletov jasady.

"Aldynda mamyr men maýsym aılaryndaǵy artyq ólim týraly derek shyqty. Koronavırýstan qaıtys bolǵandar kóp bolǵan tragedıalyq  shildeniń nátıjesin asa úreımen kútip júrdim. Endi mine, statısıka komıteti shilde aıynda ólgenderdiń deregin jarıalady. Shynaıy jaǵdaı men qaýiptengen shekten asyp tústi. Qazaqstanda excess mortality nemese koronavırýstan kelgen artyq ólim deregi 2020 jyldyń shildesinde aldyńǵy jyldarmen salystyrǵanda 15 myń – 16 myńǵa artyq boldy.

Tómendegi qarapaıym kestede mamyr men shilde aralyǵynda 23 myń - 24 myń adam artyq qaıtys bolǵany kórsetilgen. Bálkim, ólimniń barlyǵy koronavırýspen tikeleı baılanysty emes shyǵar. Tolyq analız jasaý úshin barlyq derekterdi (jynys pen jas, aımaq taǵy sol sıaqty boıynsha) jınaý qajet. Biraq osy ólimniń basym bóligi koronavırýs pandemıasymen qatysty ekeni haq" delingen ǵalymnyń facebook-tegi jazbasynda.