Fılosofıa ǵylymdarynyń doktory, profesor, ǵumyrynyń sońyna deıin Qazaq ulttyq qyzdar pedagogıkalyq ýnıversıtetinde qyzmet atqarǵan ulaǵatty ǵalym Sapar Ospanovtyń «Rýhanı-jańǵyrý-taný negizderi» atty konseptýaldy-monografıalyq oqýlyǵy jaryq kórdi. Bul týraly atalǵan oqý ornynyń baspasóz qyzmeti habarlady.

Eńbekte adamzattyń rýhanı qubylysynyń fılosofıalyq, teorıalyq jáne ony zertteýdiń ádisnamalyq máseleleri júıeli túrde kórsetilgen. Onyń asa qundy negizi – «rýh», «rýhanıat», «rýhanıattylyq» qubylystarynyń álem fılosofıasynyń mazmuny turǵysynan taldanyp, ashylǵan. Adamzat tarıhyndaǵy osy máselege qatysty oılar men danalyq paıymdar tuńǵysh ret qazaq tilinde júıeli túrde keltirilgen.

Sonymen qatar oqýlyqta qazaq halqynyń tarıhyndaǵy rýh máselesiniń bastaýlary, damý kezeńderi, qazirgi máseleleri qarastyrylǵan.

"Kitap «Teorıalyq jáne ádisnamalyq izdenister», «Ejelgi dúnıetanymdardaǵy rýhanıattylyq bastaýlary», «Batys Eýropa elderi fılosofıasyndaǵy rýhanıattylyq máselesiniń damýy» jáne «Protoqazaq-qazaq rýhanıattylyǵy» atty bólimder men 11 taraýdan turady", - delingen habarlamada.

Sarapshylardyń aıtýynsha, oqýlyq óte kúrdeli jáne kókeıtesti máselelerdi asa aktýaldy teorıalar turǵysynan kórsetken. Bul jumystyń zamanaýı áleýetin joǵary kóterýge yqpal etedi.

Konseptýaldy oqýlyq orta arnaıy jáne joǵary oqý oryndarynyń stýdentterine, magıstranttaryna, doktoranttaryna jáne osy taqyrypqa qyzyǵýshylyq tanytatyn barlyq oqyrman qaýymǵa arnalǵan.