Senat tóraǵasy Máýlen Áshimbaev "Zeren" respýblıkalyq jastar bilim berý lageriniń jumysy aıasynda jastarmen kezdesti.
Táýelsizdiktiń qadir-qasıetine, ony saqtaýdyń, ultqa, Otanǵa qyzmet etýdiń mańyzyna toqtalǵan Máýlen Áshimbaev jeltoqsannyń qazaq úshin qasterli aı ekenine erekshe nazar aýdardy.
Sonymen qatar ol osy aıda qazaq jastary erkindikke umtylǵan 86-jylǵy Jeltoqsan oqıǵasy da ótkenin tilge tıek etti.
– Jeltoqsan jastarynyń asqaq rýhy men aıbar minezi egemendikke jol ashyp berdi desek, artyq bola qoımas. Jeltoqsan aıynyń alǵashqy kúniniń de tarıhymyzda mańyzy erekshe. Sebebi, 1991 jyldyń 1 jeltoqsanynda halqymyz Tuńǵysh Prezıdentin saılady. Babalarymyz ǵasyrlar boıy ańsaǵan Táýelsizdigimizdi de 1991 jyldyń 16 jeltoqsanynda jarıaladyq, – degen Máýlen Áshimbaev 1997 jyldyń 10 jeltoqsanynda Elbasynyń Jarlyǵymen Aqmolaǵa astana mártebesi berilgenin atap ótti.
Sondaı-aq senat tóraǵasy jas býynnyń sapaly bilim alý kerektigin, alǵa bıik maqsattar qoıyp, soǵan jetý úshin talpynyp, talaptaný qajettigin atap ótti.
"Zeren" respýblıkalyq jastar bilim berý lageri 2018 jyldan beri jumys istep keledi. Lagerdiń bıylǵy qorytyndy kezdesýi "Jańa jaǵdaıdaǵy jastar: is-qımyl kezeńi" taqyrybyna arnaldy. İs-sharaǵa senat tóraǵasymen birge Aqparat jáne qoǵamdyq damý mınıstri Aıda Balaeva, prezıdenttik jastar kadrlyq rezerviniń músheleri, jastar birlestikteriniń lıderleri, volonterlar, "Bolashaq" stıpendıasynyń ıegerleri, kolejder men joǵary oqý oryndarynyń stýdentteri qatysty.
Pikir qaldyrý