Nur-Sultan qalasynyń Elmıra esimdi turǵyny burynǵy kúıeýiniń ony soqqyǵa jyqqanyn aıtyp, elden kómek surady. Aqparat "NeMolchı.kz" qozǵalysynyń Instagram paraqshasynda jarıalandy.

– Meniń burynǵy kúıeýim sińilim ekeýmizdi urdy ketti. Bul 2020 jyldyń 20 jeltoqsanynda boldy. Men úıde emes edim, sińlim habarlasyp, burynǵy kúıeýimniń kelip, podezde shý shyǵaryp turǵanyn aıtty. Kórshilerdiń mazasyn almaý úshin ol esikti ashqan. Men úıge keshki saǵat 20:10-da keldim, ol uıyqtap jatyr eken. Sińlim men balalarym onyń mas ekenin aıtyp, qolyndaǵy shólmegin kórsetti. Men ony oıatyp, dalaǵa shyǵaryp jibermek boldym, anam kele jatyr dep aldadym. Biraq esikti jaýyp úlgermedim, ol meniń qolymnan tartyp, podezge shyǵarǵysy keldi. Sińlim arasha túsip edi, ony balaǵattap, soqqynyń astyna aldy. Artynsha meni uryp, keıin tepkilep tastady. Birneshe sekýndqa esimdi joǵaltyp aldym. Esimdi jısam balalarym jylap jatyr, burynǵy kúıeýim as úıde sińlimdi uryp jatyr eken. Qolynda pyshaǵy boldy. Balalar shoshynyp, qatty jylaǵanda esin jıyp, úıden qashyp ketti, – deıdi elordalyq Elmıra.

Elmıra ózin soqqyǵa jyqty degen kúıeýimen 11 jyl birge turǵan, olardyń 2 ul jáne 1 qyzy bar. 

– Biz medısınalyq kómekke jáne polısıaǵa júgindik. Polısıa onymen túsindirme áńgime júrgizdi. Osy jaǵdaılarǵa baılanysty maǵan kómektesýińizdi suraımyn! Bizdiń zań áıelderdi turmystyq zombylyqtan qutqarýǵa dármensiz. Balalar mektepke barýǵa, tipti aýlaǵa shyǵýǵa qorqady. 2019 jyldyń qazan aıynda meniń eks-joldasym basqa áıelge ketip qalǵan. Ol ekeýin balalarym kórip qoıǵan. Sodan keıin men balalarmen birge psıhologqa júginip, kómek aldyq. Biz resmı túrde ajyrasqanbyz. Biraq ol bizdi ańdyp, uryp-soǵýyn toqtatpady, – deıdi ol.