Bilim jáne ǵylym mınıstrliginiń jalpy otyrysynda mınıstr Asqat Aımaǵambetov joǵary oqý oryndaryndaǵy ǵylym salasy boıynsha máselerdi aıtty.

– Memleket basshysy ǵylym salasyn damytý máselesin erekshe nazarda ustap otyrǵanyn jaqsy bilesizder. Ǵylym salasyn qarjylandyrý boıynsha da, basqa máseleler boıynsha da úlken kómek kórsetip otyr, máseleler sheshilip jatyr. Sondyqtan bizge muny durys ıgerip, durys jolǵa qoıyp, jumysty ashyqtyq qaǵıdasymen uıymdastyrý óte mańyzdy. Sondyqtan osy turǵyda jumysymyzdy ári qaraı jalǵastyramyz.

Joǵary oqý oryndary da osy jumysqa belsendi qatysýǵa tıis. Jınalys kezinde rektorlarǵa da osy máseleni aıttym. Ár fakúltette dekandardyń ǵylym jónindegi orynbasarlary bar. Kafedra da ǵylymmen aınalysady, ǵylym boıynsha esebin tapsyrady. Ǵylym jónindegi prorektorlar da bar. Biraq osynyń bári bolǵannan keıin jumys ta, nátıje de bolýy kerek qoı. Kommersıalızasıa keńselerin ashyp qoıdyq. Biraq sonyń mazmuny qaıda? Osy máselelerge erekshe nazar aýdaryp, bizdiń joǵary oqý oryndary osy jumysty belsendi oryndaýy kerek, – dedi mınıstr. 

Mınıstr bıyl ǵylym salasyndaǵy sıfrlandyrý máselesin, postdoktorantýra máselesin sheshý qajet ekenin atap aıtty.

– Búrokratıalyq kedergilerdi joıý kerek. Basqarý júıesinde de ártúrli búrokratıalyq kedergi kóp. Ony ózderińiz bilesizder. Biz birazyn joıyp, alyp tastadyq. Biraq desek te, áli bar. Bizge keregi: ǵylymmen aınalysatyn áriptesterimizge tek óz jumysymen aınalysýǵa jaǵdaı jasaý. Ártúrli qaǵazbastylyq, ártúrli esep berý, deńgeılerden ótý degenderdiń ózi árıne, úlken kedergi. Osyny da bárin bıyl sheshýimiz kerek.

Kadr daıarlaý máselesine de komıtet kóńil aýdarýy kerek. Zerthanalardy damytý boıynsha úlken baǵdarlama bastaldy, – dedi Aımaǵambetov.