Saıasattanýshy Marat Shıbutov telegram-kanalynda Eýropa parlamentiniń Qazaqstandaǵy saıası jaǵdaıdy synaǵan qararynyń artynda "sheteldegi oppozısıonerlerdiń lıbbıi tur" dep sanaıtynyn málimdedi.

Ol qararda tek teris fakt qana aıtylyp, jaǵymdy faktorlar týraly, jalpy jaǵdaı men onyń dınamıkasy jaıly sóz etilmegenin, muny standart manıpýlásıa dep esepteıtinin jetkizdi.

"Tipti keshigý de joq emes" degen ol qararda atap ótilgen úkimettik emes uıymdardyń qyzmetine qoıylǵan shekteý men aıyppul 4 aqpanda alynyp tastalǵanyn aıtty.

– Shyn máninde elde demokratızasıa júrip jatyr. Máselen jaı ǵana Qazaqstandaǵy adam quqyǵy jónindegi halyqaralyq búro statısıkasyna súıenip eldegi beıbit jıyndardyń sanyn alaıyq:

–  2017 jyly – 36
–  2018 jyly – 32
–  2019 jyly – 227
–  2020 jyly (qańtar-sáýir, ary qaraı karantın) – 176

Azamattyq jáne saıası belsendiliktiń munsha ósimi eldegi saıası jaǵdaı men quqyqqorǵaý salasyndaǵy tájirıbeler jaqsarmaǵanda múmkin emes bolar edi, –  deıdi saıasattanýshy.

Saıasattanýshynyń pikirinshe, Eýroparlament qarary Muhtar Áblázov sekildi sheteldegi oppozısıoner lobbıiniń nátıjesi.

–  Eýroparlament bizdegi jaǵdaıdy udaıy baqylap otyr ma? Joq. Olar jaı ǵana ózderine berilgen qujattar paketi men birneshe kezdesýdiń negizinde sheshim qabyldap otyr. Eýpoparlament synyna ilingen biz ǵana emestigimizdi aıtqym keledi. Olar Ýkraınany, Reseıdi de aıyptaǵan, –  degen ol eldegi jaǵdaıǵa monıtorıń jasaıtyn, Qazaqstan týraly naqty baǵalaý krıterıılerine ıe túrli ǵylymı jáne úkimettik emes uıymdarǵa kóbirek senetinin aıtty.

Saıasattanýshy sóz sońynda Qazaqstanda demokratıa jaǵdaıy jaqsy deı almaıtynyn, budan da jaqsy bola alatynyn jetkize otyryp, manıpýlásıa jasalýy odan da jaman ekenin atap ótti.

Buǵan deıin Eýropa parlamenti basym kópshilik daýyspen "Qazaqstandaǵy adam quqyqtaryna jónindegi" qarar qabyldaǵan. Eldegi azamattyq qoǵam aıasynyń tarylýyn, adam quqyqtarynyń buzylýyn jáne saılaýdaǵy ádiletsizdikti synaıtyn qarardy daýys bergen 693 depýtattyń 598-i qoldasa, tek 43 depýtat qarsy shyqqan. 

Qazaqstandaǵy básekesiz saılaý jáne belsendilerdi qýdalaý, saıası tutqyndar, túrmede azaptaý, sóz bostandyǵy máselelerine nazar aýdarǵan Eýroparlament depýtattary Qazaqstanǵa 20 talap qoıǵan.

Al Qazaqstan Syrtqy ister mınıstrliginiń baspasóz hatshysy Aıbek Smadıarov Eýropa parlamentiniń Qazaqstandaǵy saıası jaǵdaıdy synaǵan "qarary túsinbestik týdyratynyn" aıtady

Onyń pikirinshe, mundaı qararlardy eýropalyq parlament halyqaralyq kún tártibiniń túrli máseleleri boıynsha aıtarlyqtaı turaqty túrde qabyldaıdy.

Aıbek Smadıarov Eýropalyq odaqqa múshe memleketter prezıdent Qasym-Jomart Toqaevtyń bastamasymen qolǵa alynǵan demokratıalyq reformalardy qoldaıtynyn alǵa tartady.

– Osy sebepti jańa qarardyń mátininde paıdalanylǵan málimetterdiń naqtylyǵyna qatysty Qazaqstanda túsinbestik týyndady. Eýroparlamenttiń birqatar músheleri elimizdiń damýyndaǵy ózekti úrdisterge qatysty oń pikirlerine qaramastan, ózderiniń partıalaryndaǵy ishki tártibine sáıkes osy qarardy qabyldaýǵa daýys berdi. Sonymen qatar obektıvti kózqarastaǵy birqatar eýrodepýtattar, atap aıtqanda Maksımıllıan Kra (Germanıa), Terrı Marıanı (Fransıa) jáne Tatána Jdanoka (Latvıa) Qazaqstandy belsendi qorǵady, – dedi ol.

Brıtanıalyq The Economist jýrnaly jýyrda Demokratıa ındeksi 2020 boıynsha Qazaqstandy 128-orynǵa jaıǵastyryp, avtorıtarlyq rejımder sanatynda qaldyrǵan.