Talıban uıymynyń ókili Sýheıl Shahın Dohada Sky News basylymyna suhbattasyp, áńgime barysynda AQSH pen Ulybrıtanıa belgilengen merzimde áskerin Aýǵanstannan shyǵarmasa, saldary aýyr bolatynyn aıtty.
Ol Baıdenniń áskerin elden 31 tamyzda shyǵaratyny týraly aıtqanyn eske alyp, merzimdi uzartqysy kelse, ony basyp alýdy jalǵastyrý dep baǵalaıtynyn, munyń esh qajeti joǵyn jetkizdi.
– Eger AQSH pen Ulybrıtanıa evakýasıany jalǵastyrý úshin qosymsha ýaqyt izdeıtin bolsa, bizdiń berer jaýabymyz teris bolady. Nemese munyń saldary bolady. Bul bizdiń senimsizdigimizdi týdyrady. Eger olar (AQSH pen Ulybrıtanıa - red) basqynshylyqty jalǵastyrǵysy kelse, biz únsiz qalmaımyz, – dedi ol.
Buǵan deıin AQSH prezıdenti Djo Baıden Aýǵanstannan amerıkalyqtardy, qaýip tónýi yqtımal aýǵandardy evakýasıalaý qarqyny jyldamdaǵanyn, adamdardy elden shyǵarý merzimin uzartý boıynsha Talıban uıymymen kelissóz júrip jatqanyn aıtqan. Taraptar arasyndaǵy kelisim boıynsha evakýasıanyń sońǵy kúni 31 tamyzǵa sáıkes keledi.
Kabýl áýejaıy mańynda elden ketkisi keletin aýǵandyqtar nópiri áli basylar emes. Elden shetel áskeri shyǵarylǵan soń Aýǵanstandaǵy jaǵdaı ýshyǵa túsýi múmkin degen qaýip bar. Qazirgi tańda Kabýl áýejaıyn AQSH pen onyń odaqtastary kúzetip tur.
Pikir qaldyrý