Shymkent qalasynyń ákimi Murat Áıtenov onlaın rejımde turǵyndardy kezekti ret jeke máseleleri boıynsha qabyldap, saýaldaryna jaýap berdi. Qabyldaýda 8 azamattyń máselesin tyńdady. Turǵyndar negizinen áleýmettik sala, jer, ınfraqurylym jáne baspana máselesin kóterdi.

Qarataý aýdany, Qaıtpas-1 shaǵynaýdanynyń turǵyny Jangeldi Ospanov qoǵamdyq kólik, aıaq jol, elektr jaryǵy, asfált tóseý máselelerin jetkizdi. Qala ákimi qoǵamdyq kólikti damytýdyń keshendi sqemasyna sáıkes, Qaıtpas-1 shaǵynaýdanyna №4 baǵytttyń syzbasy boıynsha 2021 jylǵy qyrkúıek aıynyń sońyna №104 avtobýs uıymdastyrylatynyn málimdedi.

Qaıtpas-1 shaǵynaýdany Madına aıaldamasy boıyndaǵy kóshege asfált tóseý jumystary bıyl 1 qazanǵa deıin tolyq aıaqtalatyn bolady. «Ońtústik Jaryq Tranzıt» JSHS tarapynan 2021 jyldyń sońyna deıin ınvestısıalyq baǵdarlama aıasynda elektr jelileri jańartylady. Nátıjesinde, shamamen 230 abonent sapaly elektr qýatymen qamtylady.

Al, Nursát shaǵynaýdanynyń turǵyny Nurjan Edenbaıdyń máselesi boıynsha №201 úı mańynan ırrıgasıalyq aryq salýǵa aldaǵy ótetin qala búdjetiniń kezekti naqtylaýyna usynys engiziledi. Irrıgasıalyq aryq salý maqsatynda smetalyq qujattamalar ázirlengen.

Sondaı-aq, Qarataý aýdanynyń turǵyny Danıar Seıitjanov múmkindigi shekteýli balalardyń densaýlyǵy, bilim, áleýmettik kómek máselelerin sheshetin «Arda» qoǵamdyq qorynyń jumysy týraly usynysyn jetkizdi.

Qala ákimi «Qamqorlyq» qory arqyly aýtıstik dıagnozymen aýyratyn balalarǵa ortalyq ashý máselesin sheshý boıynsha jaýapty tulǵalarǵa 10 kún ýaqyt berdi. Bul máseleni sheshý úshin qala ákiminiń birinshi orynbasary Shyńǵys Muqanǵa tapsyrma berdi.

Qyzyljar eldimekeniniń turǵyny Arman Babataevty baspana máselesi qınaıdy. Ol 2015 jyldan beri turǵyn úı kezeginde turady.
Qala ákimi memlekettik turǵyn úı qorynan turǵyn úı belgilengen tártippen kezek arqyly beriletinin atap ótti. Shymkent qalasynda boıynsha jetim jáne ata-anasynyń qamqorlyǵynsyz qalǵan balalar sanaty boıynsha 60 azamattyń pátermen qamtylýy josparlanǵan bolatyn. Onyń ishinde 25 páter paıdalanýǵa berildi. Qalǵan 35 páter qurylys basqarmasy tarapynan paıdalanýǵa tapsyrylýyna sáıkes, azamattarǵa beriletin bolady.

Shahar basshysy kezekti qabyldaýda turǵyndar máselesin sheshý úshin basqarma basshylaryna, aýdan ákimderine tıisti tapsyrmalar berdi.