Ortalyq Azıa jáne Kavkaz elderiniń ǵylymı jáne bilim berý áleýetin arttyrýǵa arnalǵan İİİ Nobel Fest forýmynyń ekinshi kúninde «Bolashaq qalalary: adamzat qaıda ómir súrmek?» seksıasynyń jumysyna Shymkent qalasynyń ákimi Murat Áıtenov spıker retinde qatysyp, qalalardyń bolashaǵy men damý tendensıasy jóninde pikirin bildirdi.

Qazaqstannyń Tuńǵysh Prezıdenti, Elbasy Nursultan Nazarbaev usynǵan G-Global ıdeıasy ǵalamdyq teńgerimdi saqtaýǵa qyzmet etedi. Dúnıejúzine tanylǵan aqparattyq-kommýnıkasıalyq alańnyń usynysymen Nobel festıvaliniń minberinen elimiz atynan sóz alý mártebesi Shymkent qalasyna berildi.

«Bolashaq búginnen bastalady» aıdarymen ótip jatqan forýmda Qazaqstan megapolısteriniń atynan Shymkent qalasyna sóz berý mártebesi úlken senim ekenin jetkizgen Murat Dúısenbekuly, HHİ ǵasyr – ınovasıalar men tehnologıalar dáýiri ekenin aıtty.
«Bolashaq qalalary shekten tys ortalyqtandyrýdan arylady. Basymdyq ekologıaǵa, jasyl ekonomıkaǵa, aqyldy tehnologıalarǵa jáne kreatıvti ındýstrıaǵa beriledi»,- dedi M.Áıtenov.

Qalalardyń bolashaqtaǵy damý tendesıasyn aıtqan qala basshysy, megapolısterde árbir aýdan derbes órkendep, teńgerimdi damý jolyna túsetindigin habarlady. Jasyl tehnologıalar bolashaq qalalarynyń negizgi damý baǵyty bolyp aıqyndalmaq. Ekologıaǵa zıan tıgizý úderisteri birtindep joıylyp, elektr qýatymen júretin kólikterge basymdyq beriledi. Kólik qozǵalysyna tyıym salynǵan aýmaqtar kólemi arta bermek.

Bolashaq qalalarynyń ekologıalyq taza, qolaıly, únemdi bolýyna ınovasıalyq tehnologıalar yqpal etetin bolady. Joǵary tehnologıalar Big Data (aýqymdy derekter), jasandy ıntellekt qalalyq ortanyń sapasyn arttyrýǵa qyzmet etpek. Kreatıvti ındýstrıany endirýde bolashaq qalalarynyń turǵyndary jańa utymdy ıdeıalar usynyp, ómir súrý sapasyn kóterýge umtylatyn bolady.

«Shymkent qalasyn atalǵan baǵyttar boıynsha damytýdy iske asyryp kelemiz. Búginniń ózinde qala ınfraqurylymyn jetildirý, adam kapıtalyn damytý, ınvestısıalyq ahýaldy jaqsartý, qala qaýpsizdigin saqtaý boıynsha aýqymdy jumystar atqarylýda. Qalanyń barlyq salalarynda jańa tehnologıalar engizýdi qolǵa aldyq, ındýstrıaldy aımaqtardy qala syrtyna ornalastyrýdamyz, aýmaqtarǵa ınjenerlik jeliler júrgizip, jańa joldar salyp jatyrmyz. Shekten tys ortalyqtandyrýdan bas tartyp, ár aýdandy teńdeı damytýǵa basymdyq berdik», - dep sózin túıindegen Murat Dúısenbekuly, forým qatysýshalyryn Shymkent qalasyna meıman bolyp kelýge shaqyrdy.