Shymkent qalasynyń ákimi Murat Áıtenov «Ontustik» telearnasynyń efırinen beriletin «Ákim saǵaty» telebaǵdarlamasyna qatysty. Shahar basshysy qalanyń bıylǵy jyldyń toǵyz aıynda qol jetkizgen áleýmettik-ekonomıkalyq damý kórsetkishterin baıandap, kórermender suraqtaryna jaýap berdi.

Qala basshysy bergen aqparǵa sáıkes, shaHardyń jalpy óńirlik ónim kólemi 1020,0 mlrd. teńgege jetip, ekonomıkalyq ósim 105,2 paıyzdy quraǵan. Ónerkásip kólemi byltyrǵy jyldyń tıisti kezeńimen salystyrǵanda 106,5 paıyzǵa artyp, 555,8 mlrd. teńgege jetken. Qala kásiporyndary shyǵarǵan ónimderdiń 87 paıyzyn óńdeý ónerkásibi qurap, kólemi 484,0 mlrd. teńge bolǵan.
Qaladaǵy 4 óndiristik aımaqta barlyǵy 118 joba iske asyp, 21 myńǵa jýyq adam jumyspen qamtylǵan. Onyń ishinde 203 jumys ornymen 5 joba bıylǵy jyly júzege asqan. Kásipkerlikti qoldaý kartasy sheńberinde 5 joba iske asyp, 358 jumys orny ashylǵan.

Aýyl sharýashylyǵy salasynda 34,1 mlrd. teńgeniń ónimi óndirilip, 101,6 paıyz ósim tirkelgen. Egistik kólemi 29,3 myń gektar bolyp, 85,4 myń tonna ónim jınalǵan. Salada esepti merzimde 15 ınvestısıalyq joba iske qosylǵan.

Investısıa kólemi 260,7 mlrd. teńgege jetken. Bes jyl ishinde 2,6 trln. teńge bolatyn 282 ınvestısıalyq jobany iske asyrý josparlansa, bıylǵy jyly 152,6 mlrd. teńge bolatyn 63 ınvestısıalyq joba iske asyrylýda.

Kásipkerlikti qoldaý baǵytynda «Bıznestiń jol kartasy-2025» memlekettik baǵdarlamasyn iske asyrýǵa 7 264,6 mln. teńge baǵyttalyp, byltyrǵy jyldyń tıisti kezeńimen salystyrǵanda 3,8 esege artqan. Jyl basynan beri 1591 joba qarjylandyrylǵan. «Men kásipker bolamyn» arnaıy is-sharalar josparyna bólingen qarajat 1,5 ese qsip, 186,1 mln. teńge bólingen, 21 joba qarjylandyrylǵan.

Shahar basshysy bilim berý, densaýlyq saqtaý, mádenıet, sport salalarynyń da naqty kórsetkishterin baıandap, belgilengen mejelerdiń oryndalǵanyn atap ótti.

Turǵyn úı qurylysynda 6716 páterli 115 kópqabatty turǵyn úı bıyl paıdalanýǵa beriledi. Onyń ishinde 6 – arendalyq, 33 – kredıttik úılerden 2432 páter tapsyrylady.

Bıylǵy jospar boıynsha aýyz sýmen qamtý kórsetkishi 98 paıyzǵa, káriz júıelerimen qamtý – 54 paıyzǵa, sapaly elektrmen qamtý – 97 paıyzǵa, tabıǵı gazben qamtý – 93 paıyzǵa, áleýmettik mańyzy bar kóshelerdi jaryqtandyrý – 43,4 paıyzǵa jetetini aıtyldy.

Jol qurylysy salasynda 178 joba qarjylandyrylyp, sapaly jáne qanaǵattanarlyq jaǵdaıdaǵy joldardyń úlesi jyl qorytyndysymen 63,6 paıyzǵa jetpek. Qoǵamdyq kólik salasynda avtobýstardyń jańarý kórsetkishi bıyl 90 paıyzǵa jetip, 64 baǵyt boıynsha áleýmettik máni bar avtobýstar marshrýttary ashylǵan.

Efır barysynda qala ákimi kórermender tarapynan túsken saýaldarǵa jaýap berdi. Turǵyndar T.Rysqulov kóshesiniń kólik qozǵalysyna ashylatyn merzimin, elektr qýatynyń sapasyn arttyrý, tabıǵı gaz júıelerine qosylý, A-2 aınalma jolynyń qurylysy, taǵy basqa ózekti máseleler boıynsha saýal joldap, naqty jaýaptaryn aldy.