Elordada «Bilim-Innovasıa» HQQ jáne «Bilim Orda» HQQ-nyń uıymdastyrýymen Q (qundylyq) talks ótti.

Únemi izdenis pen úzdiksiz shyńdalýdyń nátıjesi ámánda jemisti bolaryna senimdi ustazdar men  «Bilim-Innovasıa» HQQ jáne «Bilim Orda» HQQ-ǵa qarasty mememeler qyzmet etetin ózge de mamandyq ıeleri bas qosqan jıynda bala boıyna qundylyqtardy sińirýdiń basty qaǵıdalary aıtyldy. Sahna tórinde sóz alǵan óz salasynyń úzdikteri, onyń ishinde balabaqsha tárbıeshisi, mektep dırektorlary, ustazdar, kitaphanashylar men qarapaıym eden jýýshyǵa deıin bala boıyna qundylyqty sińirýdiń basty qaǵıdasy – óz is-áreketimen úlgi bolý ekenin aıtyp ótti.

Máselen, Nur-Sultan qalasyndaǵy «Nurorda» halyqaralyq mektep-lıseıiniń eden jýýshysy «mektepti tazalap júrgende óz oıymdy da «tazalap» júremin, sebebi tazalyqqa jaqsylyq qumar bolady» degen qaǵıdany ustanatynyn jetkizdi. Al Óskemennen kelgen kitaphanashy «Ulttyń qundylyǵy – kitapta, máselen, esh shetel ádebıetinen kem túspeıtin Baýyrjan Momyshulynyń kitaby – tutas ómir mektebi ekenin dáleldep berdi» degen oı aıtty.

Sonymen qatar «Bala armanyna qulaq asý onyń úmitin alǵa jeteleıtinin, ár oqýshyny tyńdaı bilý de ustazdyń qyraǵylyǵyn kórsetedi»  degen spıker sheteldi ónerimen tańdaı qaqtyrǵan oqýshysyn sahna tórine shyǵaryp,kópshiliktiń qoshemetine bólendi. Al Atyraý er balalarǵa arnalǵan «Bilim-Innovasıa» lıseıiniń ustazy ata-anamen durys qarym-qatynas ornatýdyń kiltin óz qolymen as ázirleý arqyly tapqanyn aıtty. Sonyń nátıjesinde eshqashan as bólmege kirip kórmegen oqýshy anasyna as ázirlep, qatty tańǵaldyrǵan.

Sondaı-aq ulty orys oqýshy balanyń dombyramen án shyrqap, qazaq tilinde pikirin uǵynyqty jetkizýi kópshilikti tánti etti. Q talks-qa qatysqan meımandar jobaǵa sáttilik tilep, sharanyń barlyq mektepte jalǵasyn tabýyna tilek bildirdi.

«Búgingi Q Talks-qa qatysýshylar ártúrli jastaǵy jáne ártúrli júktemede jumys isteıtin spıkerler boldy.  Olar – mektep basshysy, muǵalimi, bilim alýshysy, mekteptiń kishi qyzmetkeri jáne kitaphanashysy, tipti mektep túlegi de bar. Árqaısysy túrli taqyrypta oı qozǵap óz tájirıbelerin bólisti. Áıtse de búkiliniń pikiri negizgi bir oıda túıisti. Ol – adamnyń adamgershilik qasıetin alǵa tartý jáne adamı qundylyqtardyń nátıjesinde qol jetkizgen jetistikteri. Barlyǵy bolashaq urpaqtyń tárbıesinde eń mańyzdysy ón boıyna túıgen adamgershilik qasıetter ekenin uqtyrdy.Osy Q Talks jobasy arqyly  muǵalim men oqýshynyń, basshy men qyzmetkerdiń uıyǵan aırandaı bir shańyraq astynda yntymaqtasa jumys isteýge bolatynyna kýáger boldyq.  Endeshe Q Talks búginge deıin bolmaǵan balamasy joq erekshe joba ekenin naqty aıta alamyz», – dedi «Bilim-Innovasıa» HQQ tárbıe bóliminiń bas mamany Dýman Danıaruly.

«Men qazaq tilin balabaqshadan bastap úırene bastadym jáne qazaq mektebine bardym. Buǵan sebep meniń til úırenýge degen qyzyǵýshylyǵymdy ata-anam erte jasta baıqap, únemi qoldaý kórsetip keledi. Men óz oıymdy qazaq tilinde erkin jetkize alamyn, sonymen qatar qazaq halqynyń ulttyq aspaby dombyrada oınaǵandy unatamyn. Dombyramen birneshe kúı tarta alamyn jáne birneshe qazaq ánin oryndap júrmin. Sonymen qatar, Altaı tilindegi óleńderdi de dombyramen aıtyp beremin. Meniń bala kezden armanym – ushqysh bolý. Ushqysh bolý úshin qazirden birneshe tilderdi ásirese aǵylshyn tilin jáne matematıka sabaǵyn jetildirip kelemin», – dedi NURORDA mektep-lıseıiniń 6 V synyp oqýshysy Zahar Palatkın.

«Meni ata-anam úsh-tórt jas shamasynda úlken dúkenge aparǵan kezde bir áýen erekshe unap, esimde saqtalyp qaldy. Keıin ol týraly umytyp kettim. Sodan bastaýysh synybynda oqyp júrgen kezimde jańa jyl qarsańynda bir áýendi estip, álgi daýys erekshe nazarymdy aýdardy. Bul sol baıaǵy estigen áýendegi ánshiniń daýsy edi. Estı sala bul qandaı óleń, qaı ánshi dep ınternetten izdestire bastadym. Sol sátten bastap men jaz óleńderine erekshe qyzyǵýshylyq tanytyp kelem. Qazir jaz óleńderiniń túr-túrin bilem, ózim aıta almasam da tyńdaǵandy unatamyn. Bul meniń hobbıime aınaldy. Qazirgi tańda bul hobbıim meniń jeke damýyma, sabaq oryndaýyma, jospar qurýyma kóp kómegin tıgizýde», – dedi NURORDA mektep-lıseıiniń 6 V synyp oqýshysy Iskander Karashýkkeev.

Aıta ketsek, Q Talks jobasy – qundylyqtarǵa negizdelgen bilim berý aıasynda júrgizilip jatqan ted talksformatyndaǵy joba. Ted talks-tan aıyrmashylyǵy, spıkerler jeke tájirıbesin, jeke basynan ótken oqıǵasyn nemese ómirdegi túıgen oılaryn bólisedi.

Q Talks jobasynyń maqsaty – qundylyqtarǵa negizdelgen bilim berý jobasyn damytý, sondaı-aq bilim jáne tárbıe berýde tyń ıdeıalar men jańashyldyqty engizý. Q Talks jobasy alǵash 2020-2021 oqý jylynda bastap ár toqsanda BIL oqýshylary arasynda ótedi. Q Talks jobasynda buǵandeıin de «Beıresmı qatynastyń jetistigi», «Bir ómirdiń hıkaıasy», «Jaýlap alǵysh shyǵarmalar», «Qundylyqty qalaı izdep taptyq», «Shynaıy ishten shyqqan alǵys»,  «Áreketke bereket», «Adamgershilik kásipke qaraı tańdalmaıdy», «Jastaı bergen tárbıe jas shybyqty ıgendeı» atty taqyryptarmen ózekti máseleler qozǵalǵan bolatyn.

Q Talks jobasyna mektep basshysy, muǵalimder, tárbıeshiler, dırektor orynbasarlary, mekteptiń pedagog emes qyzmetkerleri, ata-analar, túlekter men oqýshylary,tipti mekteptegi tárbıe men oqýǵa týra jáne janama qatysy bar kez kelgen tulǵa spıker retinde qatysa alady.