Basylym Qytaı Reseı sıaqty qarýly kúshterin keńestik úlgide jasaqtaıtyndyqtan, Sı Szınpın Reseı áskeriniń Ýkraınadaǵy basqynshylyq kezinde áshkerelengen álsiz tustaryn muqıat saraptaıtynyn jazady. Sol arqyly mundaı jaǵdaı óziniń Halyqtyq azat etý armıasynyń basyna kelýinen, Taıvan aralyna baılanysty qarym-qatynasynda qaıtalanýynan saqtanǵysy keledi.
Massachýsets tehnologıa ınstıtýty qaýipsizdik salasyndaǵy zertteý baǵdarlamasynyń dırektory Teılor Fravel Reseı áskeri ondaǵan jyl boıǵy úlken reformany, ınvestısıany bastan ótkergenine, Grýzıa, Sheshenstan, Sırıa men Qyrymdaǵy sıaqty qıyldarǵa qaramastan, Ýkraınaǵa basyp kirgende oısyraı sátsizdikke ushyrap jatqanyna nazar aýdardy.
Sózinshe, sarapshylar Ýkraınaǵa basyp kirgende Reseıdiń tıisti daıyndyǵynyń bolmaǵanyna, urys alańynda baǵdary nasharlyǵyna, áýedegi jáne jerdegi operasıalardy tıimdi úılestire almaǵanyna tań qalǵan.
Soǵys barysynda Reseı jaýyngerleriniń tamaǵy taýsylyp, kólikteri synǵan. Úlken shyǵynǵa ushyrap, áskerin Kıevten shegindirýge májbúr bolǵan. Ótken aptada zymyrandyq "Moskva" kemesi sýǵa batyp ketti. Ýkraına ony atyp túsirgenin aıtsa, Reseı tarapy apatqa keme bortyndaǵy órt sebep boldy deıdi.
Fravel "osynyń bárin kórip otyrǵan Sı Szınpın áskeri týraly shynaıy aqparat alyp otyrmyn ba dep oılanýy ábden múmkin" deıdi.
AQSH-taǵy memlekettik qyzmet kórsetý boıynsha kompanıanyń aǵa konsýltanty Devıd Chen Qytaı áskerı sheberligine baǵa beretindeı sońǵy ýaqytta iri konflıktke túspegenin, sońǵy iri qaqtyǵys Vetnammen 1979 jyly bolǵanyn atap ótti.
– Qytaı qaqtyǵys kezinde belgisiz faktorlardyń kútkendegiden de kóp bolatynyn alańdatarlyq sıgnal esebinde qabyldap otyr. Reseıdiń Ýkraınadaǵy tájirıbesi Áskerı ǵylym akademıasy men Ulttyq qorǵanys ýnıversıtetiniń qaǵazdaryndaǵy shynaıy bolyp kórinetin jaıttan is júzinde aıtarlyqtaı kúrdeli bolýy múmkin ekenin ańǵartty, – deıdi Devıd Chen.
Pikir qaldyrý