Eks-prezıdent Nursultan Nazarbaevtyń nemere inisi Qaırat Satybaldynyń burynǵy áıeli Gúlmıra Satybaldy Ýnıversıada-2017 nysandaryn jóndeýge baǵyttalǵan qarajatty urlady degen kúdikke ilindi. Bul týraly sybaılas jemqorlyqqa qarsy qyzmet málim etti.
"Almaty qalasy boıynsha Sybaılas jemqorlyqqa qarsy qyzmeti "Almaty qalasy Energetıka jáne komýnaldyq sharýashylyq basqarmasy" KMM laýazymdy tulǵalary men "Arıa-Jańa Astana" JSHS kompanıa basshylyǵyna qatysty, onyń ishinde Gúlmıra Satybaldyǵa qatysty 2019 jyly "Almaty qalasyndaǵy 2017 jylǵy Ýnıversıada" nysandary úshin qurylys-montaj jumystaryn naqty oryndalmaǵan mindetter úshin tólengen asa iri mólsherde búdjet qarajatyn jymqyrý faktisi boıynsha sotqa deıingi tergeý júrgizip jatyr. Osyǵan uqsas asa iri kólemdegi búdjet qarajatyn jymqyrý faktileri boıynsha Memlekettik organdardyń laýazymdy tulǵalary men "Arıa-Jańa Astana" JSHS basshylyǵynyń qatysýymen basqa óńirlerde sotqa deıingi tergep-tekserýler júrgizilýde. Tergeýler jalǵasyp jatyr" delingen taratylǵan aqparatta.
Ózge aqparat tergeý múddesi úshin jarıa etilmeıtini habarlandy.
Sybaılas jemqorlyqqa qarsy qyzmet buǵan deıin Qaırat Satybaldyulyna, onyń burynǵy jubaıy Gúlmıra Satybaldyǵa bıznesti reıderlik basyp alý faktisi boıynsha sotqa deıingi tergeý bastalǵanyn jarıalaǵan.
Qaırat Satybaldy 13 naýryz kúni, onyń burynǵy áıeli 17 naýryzda qamaýǵa alynǵan.
