VVS Ýkraınadaǵy soǵysqa baılanysty Reseıge qarsy buryn-sońdy bolmaǵan sanksıalar salynyp jatqanda reseılik mektepterde sanksıalardyń paıdasy týraly propaganda júrip jatqanyn habarlady.

Naýryz aıynyń sońynan beri reseılik mektepterde qoǵamtaný sabaǵynda oqýshylarǵa sanksıanyń ekonomıkany jańǵyrtýǵa tıgizer paıdasy, ımporttan arylýǵa áseri týraly vıdeodárister kórsetilip bastaǵan.

VVS-ge pikir bildirgen Chıkago ýnıversıtetiniń profesory, ekonomıs Konstantın Sonın Reseı sanksıaǵa ilinbeı turyp ekonomıkasyn ımportsyzdandyrýǵa tyrysqanda olardyń aıtqandaryn aqtaýǵa bolatynyn, qazirgi keltirip otyrǵan argýmentteri men vıdeodáristerdegi derekter naqty emes ekenin, oǵan sený qıyn ekenin aıtady.

– Elestetip kórińizshi. Siz densaýlyǵyńyzǵa kóńil bólmeısiz, artyq salmaǵyńyz bar, taıyp aıaǵyńyzdy syndyryp aldyńyz. Endi durys tamaqtanyp, trenajerlik zalǵa baryp, sol arqyly kúshti bolǵyńyz keledi. Tipti solaı istedińiz delik. Endi "aıaǵymdy syndyryp alǵanym qandaı jaqsy boldy" dep aıtar ma edińiz? Múmkin aıtarsyz. Biraq aıaǵyńyzdy syndyrmaı turyp, durys tamaqtanyp, trenajerlik zalǵa barǵan bolsańyz, aıaq ta saý, densaýlyq ta myqty bolar edi, – dep Reseıdiń aıtyp jatqan ýájin túsindirýge tyrysqan ekonomıs endigi ýaqytta Reseıge kirmeı qalǵan taýarlardyń ornyn, buryn naryqta bolǵan, biraq sapasynyń tómendigine baılanysty kópshilik tutynbaǵan taýarlar basatynyn atap ótti.