Sońǵy jyldary halyqtyń tabysy birtindep ósti. Byltyr bul ósim 5 paıyz shamasynda boldy. Biraq, Almaty, Atyraý, Qyzylorda, Mańǵystaý jáne Túrkistan oblystarynda jurttyń tabysy ortasha respýblıkalyq deńgeıge jetpeıdi. Bul kórsetkish Almaty jáne Shymkent qalalarynda da tómen. Al, Qyzylorda oblysynda halyqtyń tabysy tipti azaıyp ketti. Bıyl mamyr aıynda azamattardyń naqty tabysynyń kórsetkishi mınýs 2,9 paıyz boldy. Mundaı quldyraý kópten beri bolǵan emes. Bulaı dep prezıdent Q.Toqaev úkimettiń keńeıtilgen otyrysynda aıtty.

Memleket basshysynyń sózinshe, halyq tabysyn arttyrý baǵdarlamalarynan jurtqa tıip jatqan paıda shamaly.

Ol ákimderge jyl saıyn árbir 10 myń turǵynǵa 100 jańa jumys ornyn ashýdy tapsyrdy.

Sondaı-aq Toqaev retsiz júrgizilgen kóshi-qon saıasatynyń saldarynan keı óńirlerde jumys tabý máselesi ótkir problemaǵa aınalyp otyrǵanyn detkizdi.

– Halyq sany kóbeıgen saıyn turaqty jumys oryndary ashylýy kerek. Biraq, Mańǵystaý oblysynda osy másele eskerilmegen. Munda jónsiz júrgizilgen kóshi-qon saıasatynyń saldarynan kúrdeli ahýal qalyptasyp otyr. Turǵyndardyń sany kóbeıgenimen, áleýmettik ınfraqurylym salynǵan joq. Jumys oryndary ashylmady. Turmys sapasy tómendep ketti. Jurt "QazMunaıGaz" kompanıasyna jumysqa turǵyzýdy, joǵary jalaqy berýdi talap etýde. Ashyǵyn aıtqanda, Jańaózendegi ken oryndarynyń kópshiligi sarqylyp barady. Bul jaǵdaı barshaǵa málim. Sońǵy 15 jylda osy óńirde munaı óndirý isi 30 paıyzǵa azaıǵan. Soǵan qaramastan, jumysshylar sany 50 paıyzǵa kóbeıdi. Eńbekaqy tóleý qory 10 ese artty. Al, kóp jalaqy tólenetin úsh óńirdiń biri – osy Mańǵystaý ólkesi. Naqty aıtsaq, Jańaózen ortasha eńbekaqynyń eń joǵary deńgeıi boıynsha kósh bastap tur. Úkimet Jańaózendi damytý úshin arnaıy jospar qabyldady. Respýblıkalyq búdjetten qomaqty qarjy bólip, salyqty azaıtyp otyr. Osyndaı tikeleı qoldaý sharalary elimizdiń basqa oblystarynyń esebinen jasalýda. Jurttyń bárine munaı-gaz salasynan jumys taýyp berý múmkin emes. Muny ashyq aıtýymyz kerek, –  degen prezıdent Úkimetke ishki ekonomıkalyq resýrstardy jumyldyratyn jańa tásilder ázirleýdi tapsyryp, bul rette, halyqty ózge aımaqtarǵa kóshirý baǵdarlamasyn túbegeıli qaıta qaraý kerektigine nazar aýdardy.

– Biz tarıhı Otanyna oralǵan qandastardy tolyq qoldaımyz. Biraq, tek Mańǵystaý óńirimen shektelýge bolmaıdy. Basqa oblystarǵa, sonyń ishinde óndirisi damyǵan aımaqtarǵa qonystanýǵa bolady. Biz qajetti jaǵdaıdy jasaýǵa daıynbyz, – dedi ol.