Almaty qalasynyń ákimdigi Memleket basshysynyń tapsyrmalaryn belsendi iske asyrýda. Qala ekonomıkasynyń turaqty ósýi qamtamasyz etildi. Qysqa merzimdi ekonomıkalyq ındıkator 107,6%-ke deıin ósti. Bul týraly Almaty ákimi Erbolat Dosaev Ortalyq komýnıkasıalar qyzmetinde ótken brıfıńte málimdedi.

«Osy jyldyń basynan beri 16,3 myń jumys orny quryldy. 3,3 myń oryndyq 54 bala baqsha ashyldy, 45 km ınjenerlik jeli salyndy. Gazben júretin 300 avtobýs satyp alyndy, 145 myń aǵash otyrǵyzyldy. Bıyl qyrkúıek aıyna deıin Almaty aglomerasıasyn damytýdyń keshendi jospary ázirlenedi. Bul josparda megapolıs pen Almaty oblysy sınergıasynyń jobalary aıqyndalatyn bolady»,- dedi ákim.

Onyń aıtýynsha, óńdeý ónerkásibi, qurylys, kólik, baılanys qyzmetteri ekonomıkanyń ósý draıverlerine aınaldy. Joǵary ınvestısıalyq belsendilik baıqalady. Jyl basynan beri negizgi kapıtalǵa salynatyn ınvestısıalar 21%-ǵa ósti. 

Qala ekonomıkasynyń negizgi salasy – saýda jyl basynan beri alǵash ret 1,7%-ǵa artyp, «oń aımaqqa» shyqty.

Osy jyldyń 5 aıynda Almatydaǵy iskerlik belsendilik ındeksi 4 prosenttik tarmaqqa ósip, mamyr aıynyń sońynda 48,7%-dy qurady. Birinshi jarty jyldyqtyń qorytyndysy boıynsha 50%-dan astam deńgeımen oń aımaqqa shyǵý kútiledi.