Májilis salyq týraly zańnamaǵa engiziletin ózgeristerdi qabyldap, el aýmaǵyna shetelden 2022 jylǵy 1 qyrkúıekke deıin kirgen kólikterdi zańdastyrý úshin alynatyn bir rettik tólem mólsherin aıqyndady.
Ekinshi oqylymda maquldanǵan jobaǵa saı, bir rettik tólem mólsheri 200 myń teńgeni quraıdy.
Zańdastyrylatyn kólik quralynyń kategorıalaryn, tártibin, sharttary men tólem jasaý merzimin úkimet anyqtaıdy.
Buǵan deıin İshki ister mınıstrligi zańdastyrylǵan avtokólikterge aq nomer beriletinin, Eýrazıalyq ekonomıkalyq odaqqa kirmeıtin elderden ákelingen kólik ıeleri keden alymdaryn tóleıtinin, kóliktiń jasy men ekologıalyq klassyna talap qoıylmaıtynyn habarlaǵan.
1 qyrkúıekten keıin kirgizilgen, izdeýde júrgen, buryn tirkelgen elden esepten durys shyǵarylmaǵan, róli oń jaqtaǵy kólikter zańdastyrylmaıdy.
Al jalpy prosestiń jaı-japsary aldaǵy ýaqytta belgili bolady. Kólikterdi zańdastyrýdy 2023 jylǵy 1 qańtardan bastaý kózdelip otyr.
Pikir qaldyrý