2023 jylǵy 26 sáýirde Astanada Qazaqstan halqy Assambleıasynyń HHHİİ sesıasynyń delegattary úshin paneldik pikir talas alańy ótti.

Paneldik talqylaýlarǵa Prezıdent Ákimshiliginiń basshylyǵy, ortalyq jáne jergilikti atqarýshy organdardyń basshylary, Parlament depýtattary, QHA músheleri, respýblıkalyq jáne oblystyq etnomádenı birlestikterdiń tóraǵalary, dinı birlestikterdiń, ÚEU, dıplomatıalyq korpýs, ǵylymı qyzmetkerler, shyǵarmashylyq ıntellıgensıa, qazaqstandyq jáne sheteldik BAQ ókilderi, barlyǵy 1000-nan astam adam qatysty.

Paneldik talqylaý jumysyn Qazaqstan Respýblıkasy Prezıdenti Ákimshiligi Basshysynyń orynbasary A.G.Balaeva ashty.

Sesıaǵa qatysýshylardy quttyqtaǵan Aıda Balaeva óz sózinde ótken jyldan bastap sesıa formaty ózgergenin, al búgin otyrystyń alǵashqy kúni QHA jumysyn jaqsartý, onyń qoǵamdyq qurylymdarynyń – etnomádenı birlestikterdiń, analar keńesiniń, aqsaqaldar keńesiniń, «Assambleıasy jastary» jastar qanatynyń, kásipkerler qaýymdastyǵynyń jáne basqa da qurylymdarynyń jumysyn jetildirý joldaryn talqylaýǵa arnalǵanyn atap ótti.

«Ótken jyl reformalar jyly boldy jáne olardyń tabysty júzege asýyna, atap aıtqanda, ishki saıası turaqtylyq pen birlikti saqtaý men nyǵaıtýǵa Assambleıanyń barlyq ınstıtýttary, búginde de óz úlesin qosýda» - dep joǵary baǵalady. «Bizdiń maqsatymyz bir – elimizdiń egemendigin saqtaý. Elimizdiń táýelsizdigi – barsha qazaqstandyqtardyń ortaq qundylyǵy» - dep nyqtady Aıda Balaeva. Ol óz sózinde «Rýhanı birlik pen qundylyqtardy ózara qurmetteý negizinde ǵana qoǵamdyq kelisimge kelemiz. Kez-kelgen memlekettiń órkendeýi – jalpy qoǵamdyq kelisimniń nátıjesi. Bul – Memleket basshysy aıtqan «birlik - áralýandylyqta» qaǵıdasynyń myzǵymas máni», - dep atap ótti.

Sóz sońynda A.Balaeva «Prezıdenttik reformalardy júzege asyrý úderisi qarqyndy júrip jatyr. Mine, Assambleıanyń keń jelisi Memleket basshysynyń bastamalaryn júzege asyrý boıynsha qoǵamdyq baqylaýdy kúsheıtýge múmkindik beredi», - dedi.

Qazaqstan Respýblıkasy Parlamenti Májilisi Tóraǵasynyń orynbasary Albert Raý da óz sózinde ótken jyl saıası oqıǵalardyń sany jaǵynan da, olardyń bolashaq úshin mańyzy jaǵynan da tarıhı reformalar jyly dep atalýynyń oryndy ekenin aıtyp ótti. Sonymen qatar, «Eldi ózgertýdiń barlyq úderisterinde QHA jáne etnomádenı birlestikteri ókilderiniń eldiń turaqtylyǵy men birligine úlesi mańyzdy rol atqarady», - dep elimizdiń qazirgi zamanǵy tarıhynda Assambleıanyń rólin atap kórsetti.

Assambleıanyń qoǵamdaǵy rólin atap ótken «Vaınah» Qazaqstan sheshenderi men ıngýshtar qaýymdastyǵynyń tóraǵasy Ahmed Mýradov ta bul uıym ataýyn ózgertpegen jalǵyz uıym ekenin, Prezıdent Qazaqstan halqy Assambleıa tóraǵasy bolyp qala beretinin basa aıtty. Osy oraıda ol óz sózin qorytyndylaı kele, «Biz kez-kelgen synaqqa tótep bere alatyn quqyqtyq, ádiletti Qazaqstandy qurý jónindegi mindetterdi júzege asyrýda Memleket basshysynyń ujymdyq kómekshisimiz», - dedi.

Bilim mınıstri Ǵanı Beısembaev elimizdegi bilim berý uıymdarynyń quramy kópetnosty ekenine toqtaldy. Naqty aıtqanda, bilim berý mekemelerinde oqýshylardyń dúnıege kózqarasy, qundylyqtary men baǵdarlary qalyptasady, úlkendi-kishili qarym-qatynastyń jeke tájirıbesi jınaqtalady. Ol, sondaı-aq, balanyń toleranttylyq sanasyn qalyptastyrýda otbasynyń jáne otbasyndaǵy qarym-qatynas atmosferasy, ata-ana men týystar arasyndaǵy qarym-qatynas stıli bala úshin mańyzdy ekenin, etnosaralyq toleranttylyqtyń qalyptasýyna aıtarlyqtaı áser etetinin atap ótti. Sonymen qatar, Ǵanı Beısembaev bilim berý uıymdary turaqty, pozıtıvti jáne tolerantty kópetnosty qaýymdastyqty qalyptastyrý úshin QHA aımaqtyq qurylymdary jáne etnomádenı birlestiktermen turaqty negizde yntymaqtastyqta bolýy qajet dep sanaıdy.

Qazaqstan koreıleri qaýymdastyǵynyń tóraǵasy Iýrıı Shın óz sózinde Qazaqstan koreıleri qaýymdastyǵynyń negizgi basymdyǵy - Qazaqstandaǵy qoǵamdyq-saıası turaqtylyqty qamtamasyz etý boıynsha memlekettik saıasatty júzege asyrýǵa qatysý ekenin atap ótti. Al etnosaralyq qatynastar salasynda memleket pen qoǵamnyń azamattyq ınstıtýttary arasyndaǵy ózara is-qımyldyń tıimdiligin arttyrý - basty mindet, – dedi Iýrıı Shın. Sondaı-aq, ol qaýymdastyqtyń qyzmeti men aldaǵy jobalaryna toqtaldy. «Bıyl biz «Qazaqstan koreıleriniń jastar qozǵalysy» respýblıkalyq forýmy sıaqty sharalardy ótkizemiz. «AKK Networking» respýblıkalyq forýmy, respýblıkalyq «Kore ılbo» gazetiniń 100 jyldyǵyn uıymdastyrý josparlanýda, - dedi ol.

Seksıada kelisim, toleranttylyq atmosferasyn qalyptastyrýdaǵy dástúrlerdiń, mádenıet pen bilim salasynyń yqpaly, sondaı-aq QHA saıası reformalardy júzege asyrýdaǵy jáne qoǵamdyq birlikti nyǵaıtýdaǵy qyzmeti talqylandy.

Sesıa delegattary talqylaýlar men pikirtalastarǵa belsene qatysty. Rýhanı-adamgershilik, jalpyadamzattyq jáne azamattyq qundylyqtardy qalyptastyrýdyń, toleranttylyqtyń joǵary mádenıetin, tulǵaaralyq jáne etnosaralyq qarym-qatynasty, patrıotızmdi, sondaı-aq balalardyń tulǵalyq, erik-jigeri, fızıkalyq jáne ıntellektýaldyq daıyndyǵyn tárbıeleýdiń, áleýmettik ózara is-qımyl jáne oń etnosaralyq komýnıkasıalardyń ózekti máseleleri kóterildi.