19-sáýirde Almaty qalasynyń QHA Analar keńesi Almaty qalasy Jumyspen qamtý jáne áleýmettik baǵdarlamalar basqarmasynyń «Aıala» áleýmettik qyzmet ortalyǵy KMM-ne bardy. Respýblıkalyq «Qaıyrymdylyq kerýeni» aksıasy aıasynda qasıetti Ramazan aıynda Almaty qalasy QHA Analar keńesiniń tóraǵasy, ortalyqtyń baqylaý keńesiniń múshesi M.V. Israılovanyń basshylyǵymen «Aıala» ortalyǵynda ıgi is-shara ótti.

Almaty qalasy «Qazaqstan dúngen qoǵamy» qoǵamdyq birlestiginiń Analar keńesiniń qoldaýymen, tóraıymy Rımma Masyrova «Aıala» ortalyǵynyń búldirshinderine úlken teledıdar syıǵa tartty.

Almaty qalasy QHA Analar keńesi «Aıala» ortalyǵynyń balalary úshin turaqty negizde túrli qaıyrymdylyq jáne oıyn-saýyq sharalaryn ótkizip turady. Máselen, Halyqaralyq múmkindigi shekteýli jandar kúninde osy ortalyqtaǵy 120 bala meıramhanaǵa shaqyrylyp, olarǵa merekelik dastarhan jaıylyp, jarqyn konserttik baǵdarlama men anımasıalyq shoý uıymdastyryldy. Sondaı-aq «Mektepke jol» aksıasy aıasynda «Aıala» ortalyǵynyń balalary da nazardan tys qalǵan joq. Analar keńesi olarǵa keńse quraldary bar mektep rúkzaktarymen qamtamasyz etip turady.

Anyqtama úshin: Jumyspen qamtý jáne áleýmettik baǵdarlamalar basqarmasynyń «Aıala» áleýmettik qyzmet ortalyǵy komýnaldyq memlekettik mekemesi KMM úı jáne jartylaı stasıonar jaǵdaıynda psıhonevrologıalyq aýrýlary bar, tirek-qozǵalys apparaty buzylǵan jáne psıhonevrologıalyq patologıasy bar 1,5 jastan 18 jasqa deıingi balalarǵa jáne 18 jastan asqan tulǵalarǵa arnaýly áleýmettik qyzmet kórsetedi. Ortalyq búginde 229 múmkindigi shekteýli janǵa qyzmet kórsetedi.  

«Aıala» áleýmettik qyzmet kórsetý ortalyǵynyń negizgi maqsaty – árbir qyzmet alýshynyń jeke damýyn eskere otyryp, úıde jáne jartylaı stasıonar jaǵdaıynda sapaly jáne tıimdi arnaýly áleýmettik qyzmetterdi kórsetý – áleýmettendirý, úıde beıimdelý, ońaltý jáne qoǵamǵa ıntegrasıalaý.