Redaksıamyzǵa on eki jastaǵy qyzyn emdete almaı júrgen Taraz qalasynyń turǵyny Alhanova Raýshan Oljabaıqyzy habarlasty. Ol birneshe kúnnen beri  tarazdyq dárigerlerdiń esigin tozdyryp júrse de, qyzyna qajet em ala almaǵanyn aıtady. 

Raýshan Alhanovanyń qyzy Alına 3 sáýir kúni pnevmonıamen Taraz qalasyndaǵy juqpaly aýrýlar aýrahanasyna túsedi. 16 kún em alǵannan keıin dárigerler juqpaly aýrýlar bóliminde balaǵa basqa da aýrýlardyń juǵý qaýpi bar ekenin eskertip, basqa aýrýhanaǵa qaralý keregin aıtqan. 

Aýrýhanadan shyqqan soń Alınanyń qysymy kóterile bastaıdy. Eki kúnnen soń qaıtadan Jambyl aýdandyq balalar aýrýhanasyna túsken. Alınaǵa glıoz, VSD, gastrıt, gepatıt jáne búırek gıdrokalıkozy degen dıagnoz qoıylady. 

"Ol Jambyl aýdandyq balalar aýrýhanasynda sáýir aıynyń sońyna deıin em aldy. Aýrýhanadan shyǵarda dárigerler 10 kún demalystan keıin balany ózi tirkelgen emhanasyna aparý keregin aıtty. Úzdiksiz alǵan antıbıotıkter balanyń ish–qurylysyna keri áser etkenin eskertip, tirkelgen emhanasynda ish–qurylysyn emdetýge keńes berdi", – deıdi Raýshan Oljabaıqyzy. 

On kúnnen keıin balasyn alyp kelgen anany Alına tirkelgen №7 emhananyń pedrıatrıa bólimi aýdıt jáne pasıentterdi qoldaý bólimine jiberedi. Alaıda qyzynyń densaýlyǵy úshin sharq urǵan Raýshan Alhanovany aýdıt bólimindegi dáriger: "Aýrýhanada oryn joq. Osyǵan deıin eki ret qaralyp shyqtyńyzdar. Qyz ózińizdiki, ózińiz emdep alyńyz"– dep shyǵaryp salǵan.

Alınanyń qazirgi jaǵdaıy nashar. İsh-qurylysyna zaqym kelgen. Al aıtqanyna kónbegen soń dárigerler Alınanyń anasyna emhana psıhologyn ákelip, "áńgimeńizdi tyńdaıtyn osy kisi" dep aıtqan. 

"Meni mazaq etkender kúlip tur. Osy sózderińizdi kameraǵa aıtyńyzshy degenimde, "qyzyńdy emdep al" degen dáriger birden ózgerip shyǵa keldi",– deıdi búginde qyzynyń densaýlyǵyna alańdaýly ana.

Raýshan Oralbaıqyzy qyzynyń tolyq em-dom alýyn, aıaqqa turyp ketýin qalaıdy. Áli kúnge deıin aýrýhanaǵa baryp júrgen tarazdyq áıel dárigerlerden qajetti kómek ala almaǵanyn aıtty.