Mańǵystaý oblysynyń mádenıet, arhıvter jáne qujattama basqarmasynyń tapsyrysy boıynsha «Otpan taýdan-Ulytaýǵa» respýblıkalyq jobasy júzege asyrylýda. Joba aıasynda sýretshiler men vıdeograftardan quralǵan mańǵystaýlyq bir top shyǵarmashylyq ıeleri - «Otpan taýdan-Ulytaýǵa» atty 20 kúndik ekspedısıa uıymdastyrdy. Sapar barysynda qatysýshylar jol talǵamaıtyn kóliktermen elimizdiń jeti óńirinde bolyp, ondaǵy mádenı nysandarynyń jaı-kúıimen tanysty. Ekpedısıanyń negizgi maqsaty-ishki týrızmdi nasıhattaý jáne Qazaqstannyń tarıhı-mádenı, kórikti jerlerimen tanysý, dep habarlaıdy Mańǵystaý oblysy Qoǵamdyq komýnıkasıa ortalyǵy.

Mańǵystaýlyq sýretshiler «Otpan taý – Saraıshyq – Bókeı orda – Qorqyt ata – Qoja Ahmet Iassaýı - Jádigerler kesheni» marshrýty boıynsha saıahattady. Óz isiniń sheberleri obektıvterine aralaǵan óńirleriniń tarıhı-mádenı sáýlet eskertkishterin, murajaılarymen men ásem tabıǵatyn syıǵyzdy.

Ekspedısıa quramyna Aqtaý Sýretshiler odaǵynyń múshesi Tynyshbek Baltabaev, sýretshiler Aımurat Tańatov, Dáýren Aralbaev, Asqat Nurmuhanov, Azamat Kúreǵulov, Jánibek Súıinbekov, Óner kolejiniń stýdentteri Aıtolqyn Sandeshova, Symbat Berikqyzy, Arýjan Qýat, sondaı-aq vıdeograf Nurken Tájibaı kirdi. Ekspedısıaǵa qatysýshy Aımurat Tańatov sapar barysynda jasalǵan týyndylar adamdardyń tabıǵat pen ulttyq biregeılikti saqtaýǵa degen qyzyǵýshylyǵyn arttyrýǵa jol ashatynyn atap ótti.

"Ekspedısıa barysynda biz qazaq tarıhyndaǵy eń jumbaq qala-Saraıshyqqa bardyq. Sondaı-aq, elimiz úshin mańyzdy qaıratkerler Mahambet Ótemisulymen Isataı Taımanulynyń qabirlerin araladyq. 175 jyl buryn Taras Shevchenko ekspedısıamen barǵan Aqtóbe oblysyndaǵy Yrǵyz aýylyn kórý baqytyna ıe boldyq. Aqsý-Jabaǵyly qoryǵyn, Qoja Ahmet Iassaýı jáne Joshy han kesenelerin araladyq. Biz saıahat barysynda turaqtaǵan árbir jerimizde etúd jazdyq. Sýretshi retinde bul sapar men úshin tarıhqa bir sátke bolsyn úńilýge tamasha múmkindik boldy", - dedi Aımurat Tańatov.

Ekspedısıa aıasynda Atyraý, Batys Qazaqstan, Qyzylorda, Túrkistan oblystarynyń kásibı sýretshileriniń sheberlik synyptary uıymdastyryldy. Olar Atyraý oblysynyń «Han ordasy Saraıshyq» tarıhı-memorıaldyq kesheninde, Batys Qazaqstan oblysynyń «Bókeı Orda» tarıhı-mýzeı kesheninde, Qyzylorda oblysynyń «Qorqyt ata» kesenesinde, Túrkistan oblysynyń «Áziret Sultan» tarıhı-memorıaldyq kesheninde, Ulytaý oblysynyń «Joshy han» tarıhı-memorıaldyq kesheninde, sondaı-aq «Jádigerler kesheninde» ótti.

Mańǵystaýda tanymal vıdeooperator Nurken Tájibaı óziniń tájirıbeli saıahatshy ekenin aıta kele, «Otpan taýdan - Ulytaýǵa» ekspedısıasy basqa saıahattarmen salystyrǵanda sanasynda erekshe áser qaldyrǵanyna toqtalyp ótti.

"Sýretshilermen saıahattaý-bul dostaryńmen nemese týrısermen saparlardan erekshelenetin tańǵajaıyp tájirıbe. Sýretshilerge kenepte kórgenderin jetkizý úshin ýaqyt pen shabyt qajet. Sýret salý prosesi óte qyzyqty jáne qarap turǵan adamdy elitip áketedi. Maǵan Ulytaý oblysyna, ásirese Jezqazǵanǵa sapar óte unady. Jerlesterimiz bizdiń mádenıetimiz jáne muralarymyzben biz oılaǵannan áldeqaıda jete tanysýǵa umtylady dep úmittenemin", - dedi Nurken Tájibaı.

Mańǵystaý oblysynyń mádenıet, arhıvter jáne qujattama basqarmasynyń basshysy Ábilqaıyr Baıpaqov mundaı is-sharalardy ótkizý tájirıbe men bilim almasýǵa, ózara birigip jobalar jasaýǵa, qazaq mádenıetin tanýǵa jáne týrızmniń damýyna úles qosýǵa biregeı múmkindik beretinin atap ótti.

Aıta keteıik, plener-ekpedısıanyń nátıjesi retinde kúzde Astana qalasynda Mańǵystaý sýretshileriniń týyndylarynyń kórmesin uıymdastyrý josparlanǵan.