Almaty oblysy Polısıa departamentiniń burynǵy basshysy, 10 jylǵa bas bostandyǵynan aıyrylǵan Serik Kúdebaevtyń Óskemen túrmesindegi sýreti áleýmettik jelige tarap ketýine baılanysty qyzmettik tekserý júrgiziledi. 

Bul týraly Qylmystyq atqarý júıesi komıtetiniń baspasóz qyzmeti habarlady. Qazir sottalǵandardyń uıaly telefon paıdalanýy, beınebaqylaý kamerasynyń obektıvin jabýyna qatysty qyzmettik tergeý taǵaıyndalǵan.

"İİM buıryǵymen bekitilgen ishki tártip erejeleri boıynsha qylmystyq atqarý júıesinde qamaýda otyrǵan sottalýshylar azyq-túlikti syrttan sálemdeme retinde nemese týysqandarymen kezdesken kezde qabyldaýǵa haqyly. Bul talap qylmystyq atqarý júıesindegi mekemelerdiń barlyǵyna ortaq. Aldyn ala málimet boıynsha, Shyǵys Qazaqstan oblystyq qylmystyq atqarý júıesi departamentiniń №22 mekemesinde sottalǵandar týysqandarynan daıyn tamaq qabyldap alǵan. Tekserý kezinde tyıym salynǵan azyq-túlik ónimderi tabylǵan joq. Qazirgi tańda sottalǵandardyń uıaly telefon qoldanýy jáne beınebaqylaý kamerasynyń obektıvin jaýyp tastaý faktisi boıynsha qyzmettik tergeý taǵaıyndaldy. Zań buzylǵan jaǵdaıda qoldanystaǵy zańnama aıasynda shara qoldanylady", - delingen resmı habarlamada.