Osynyń aldynda jazǵandarymyzda, Almaty oblysynyń dıqandary bıyl qant qyzylshasynan buryndary bolyp kórme­gen bıikti baǵyndyryp, gektar berekeligin rekordtyq deńgeıge jetkizgenin baıandaǵan edik.
 Qyrkúıektiń sońynda «Kóksý» qant zaýytyna ónimderin ótkize bastaǵandar arasynda gektarynan 700 sentnerden, sa­pa­ly ári iri tátti túbir jınaǵan sarqandyq sha­rýashylyqtar da bolǵan. Kúni keshe ob­lys ákimi Amandyq Batalov Sarqan aýdany­na arnaıy at basyn buryp, qant qyzyl­shasyn ósirip otyrǵandarmen jo­lyqty, áńgimelesti. Qandaı qoldaý qajet­tigin su­rady. Sonymen birge aýdanda sa­lynyp jat­qan serpindi jobalardyń jaı-japsaryna úńildi. Qysqa ázirlik barysyn saralady.
Oblys basshysy birinshi kezekte aýdan shekarasyndaǵy «Samal» sharýa qojaly­ǵynyń qyzylsha alqabyna bardy. Deste­lenip jınalyp, kólemimen ári sapasymen kóz tartatyn tátti túbirdi qolyna alyp qa­raı júrip, dıqan qaýymmen pikirlesti. 
 – Amandyq Ǵabbasuly, qyzylsha ónimin qabyldaýdaǵy 3-4 jylǵa sozylǵan toqyraýdyń saldarynan kútip-baptaýyna kóp kúsh jumsalatyn tehnıkalyq daqyldan bas tarta bastaǵan bolatynbyz. Bıyl da úmitten góri kúdik basym bolyp, bar-joǵy jeti gektarǵa ǵana tuqym sińirdik. Baby ke­lisip, sýdan kende bolmaǵannan keıingi ná­tıje oıdaǵydaı. Ónim gektaryna 500 sent­nerden aınalýda. «Kóksý» qant zaýyty ke­lisimshartta kórsetilgen mindettemele­­rin tolyq oryndasa, keler jyly qyzylsha alqabyn eseleýge daıynbyz, – deıdi sharýa qojalyǵynyń basshysy Ermek Qalıev.
Sol jerde sóz kezegin alǵan oblys ákimi­­niń orynbasary Serikjan Beskem­pi­rov «Kóksý» zaýyty tarapynan qyzylsha tasymaldaıtyn avtokólik shyǵynynyń 40 paıyzy óteletinin, basqa da jeńildikter qarastyrylǵanyn jetkizse, Sarqan aýda­ny­nyń ákimi Erǵazy Qoshanbekov óndiril­gen ónimdi ysyrapsyz jınap alý maq­sa­tyn­da uıymdastyrylǵan sharalarǵa toqtaldy. Amandyq Ǵabbasuly qazylǵan ónimdi jı­nap, daqyldy japyraǵynan ajyratyp, taý-taý qylyp úıip jatqan Sarqan polıteh­nıkalyq koleji bilimgerlerimen de emen-jarqyn áńgime-dúken quryp, óndiristik tájirıbeden óte júrip, qosymsha qarjy ta­batyn jastardyń jumysyna sáttilik tiledi. 
Baqalydaǵy, Cherkassk aýyldyq ok­rýgin­degi egistik alqaptaryndaǵy ónim be­rekeligi sarqandyq dıqandardyń qyzylsha ósirýdiń qyr-syryn jetik meńgergendigin kórsetti. Baqalylyqtardyń arnaıy tehnı­kanyń kómegimen qyzylshanyń japyra­-ǵyn oryp alyp, tátti túbirdi kombaın býn­kerinen birden kólikterge tıeıtini basqa sharýashylyqtarǵa úlgi retinde usynýǵa boltyn tásil ekendigi de áńgime ózegine aınal­dy. Osyndaǵy «Aqqudyq» sharýa qojalyǵynyń basshysy Serikjan Esim­janovtyń rekordtyq kórsetkishke – gek­-tar ónimdiligin 700 sentnerge jetkizgenin budan buryn jazǵan edik. 25 gektar alqaptan 2000 tonna ónim jınaýdy josparlaǵan qojalyq músheleri alǵashqy kúnderi-aq 
780 tonna ónimdi zaýytqa ótkizip úlgeripti. Al Cherkasskidegi quıqaly alqapqa túren salǵan Erjan Madárovtyń alty aı jaz boıǵy tynymsyz tirligi 105 gektar egistik­tiń ár gektarynan 400 -450 tonna ónim alýǵa negiz qalapty. 
Qoılyqtaǵy «Sarqan Agro» jaýap­ker­shiligi shekteýli seriktestigi kútip-baptap otyrǵan alma baq oblys basshysynyń na­zaryn aýdardy. Munda 100 gektar aýmaqtyń ár gektaryna 800 kóshet otyrǵyzylǵan 66 myń dana alma aǵashy úsh jyldyń ishinde boılap ósipti. Keler jyly alǵashqy ónim alynbaq. Baq tamshylatyp sýarý ádisimen ósiriledi. 
Osy baq aýmaǵynda arnaıy jabdyq­tal­ǵan kórmede «Mádı», «Malaı bı», «Dáý­ren­bek» sharýa qojalyqtarynyń jetekshileri jospar-jobalaryn ortaǵa salsa, aýdan ákiminiń orynbasary Azamat Sársembaev aýyl sharýashylyǵy boıynsha kórset­kish­termen tanystyrdy. 
Sarqanda qýattylyǵy 17 MVt bolatyn «Lepsi-2», qýattylyǵy 4,2 MVt bolatyn «Basqan-1» sý elektr stansıalary saly­nýda. Óńir basshysy osy saparynda taıaý­da iske qosylatyn, ekonomıkalyq mańyzy 
zor «Lepsi-2» stansıasynyń qurylysyn kózben kórdi. Sondaı-aq aýdan ortaly­ǵyndaǵy ortalyq qazandyqtyń qysqa da­ıyndyǵyn baıqap kórip, birqatar esker­tý­ler jasady. 
 

Derekkóz: Aıqyn aqparat