«Memlekettik nemese áskerı qyzmetkerdiń qumar oıyn oınaǵany týraly fakt anyqtalsa, ol birden qyzmetinen bosatylady. Memlekettik qyzmetkerlerge qatysty eskertý jasalmaıdy. Birden qyzmetten bosaıdy», – dedi Tólebaev

Senat Qazaqstandaǵy lýdomanıaǵa qarsy kúres jónindegi zań jobasyn maquldady. Zańǵa sáıkes, memlekettik qyzmetshilerge, áskerı qyzmetshilerge jáne 21 jasqa tolmaǵan adamdarǵa qumar oıyn oınaýǵa tyıym salynady. Qujat sonymen qatar býkmekerlik keńselerdegi stavkalardy esepke alý júıesin reformalap, shotty toltyrý jáne utys alý kezinde bıometrıalyq sáıkestendirýdi engizedi.

«21 jasqa deıingi azamattardy, boryshkerlerdiń biryńǵaı tiziliminde turǵan azamattardy, sondaı-aq, qumar oıyndarǵa jáne bás tigýge qatysýǵa shektelgen adamdardy qatysýǵa jibergeni úshin ákimshilik jaýapkershilikti engizý boıynsha túzetýler engizildi», – dep kórsetilgen zań jobasyna qorytyndy mátininde.

Túzetýge sáıkes, elektrondyq jáne ınternet-kazınolardy uıymdastyrý qylmystyq jaýapkershilik bolady. Qumar oıyndarǵa táýeldi adamdardy ońaltý jáne olarǵa konsýltasıalyq baqylaý júrgizý tártibin belgileıdi.

Týrızm mınıstrliginiń habarlaýynsha, jeti myńnan astam qazaqstandyq eGov Mobile arqyly qumar oıyndar men bás tigýge óz-ózine shekteý qoıdy. 

QR azamattary men rezıdentterin qumar oıyndarǵa jáne bás tigýge qatysýdan óz betinshe shekteý jónindegi onlaın qyzmet 18 naýryzda pılottyq rejımde iske qosylǵan. Birinshi sáýirdegi málimetterge sáıkes, qyzmetti jeti myńnan astam adam paıdalanǵan. Qaǵaz formatynda qumar oıyndar men bás tigýden úsh myńnan astam adam ózderin shektegen.

Oıyn bıznesine qatysty aparattyq-baǵdarlamalyq keshenderin ıntegrasıalaý tártibi «Aqparattandyrý týraly» Qazaqstan Respýblıkasynyń Zańynda belgilengen tártippen, sondaı-aq Qazaqstan Respýblıkasy Úkimetiniń 2016 jylǵy 20 jeltoqsandaǵy №832 qaýlysymen bekitilgen Aqparattyq-kommýnıkasıalyq tehnologıalar jáne aqparattyq qaýipsizdikti qamtamasyz etý salasyndaǵy biryńǵaı talaptarynda belgilengen tártippen retteledi.