Búgin Úkimet Qazaqstanda atom elektr stansıasyn salý týraly bastama kóterdi.Bizdiń aldymyzda elimizdiń odan ári ekonomıkalyq, saıası jáne áleýmettik damýynyń vektoryn aıqyndaıtyn mańyzdy tańdaý tur.

Referendým qarsańynda elimizdiń birneshe óńirlerinde qoǵamdyq tyńdaýlar ótti. Mamandar bul taqyrypty qyzý talqylap, túrli pikirlerin bildirýde. Olardyń kópshiligi Qazaqstannyń beıbit atom energıasynan qýat alatyn alpaýyt el bolǵanyn qalaıdy.

El bolashaǵyn aıqyndaıtyn jaýapty sheshimnen Ulttyq palata da shet qalmady. Biz álemdik tájirıbege, osy saladaǵy ǵalymdar men mamandardyń – sala mamandarynyń dálelderine súıenemiz.

Ózderińiz bilesizder, «Atameken» sarapshylary túrli alańdarda óz ustanymdaryn dáleldep keledi.

Ulttyq palata Úkimettiń bul bastamasyn tolyǵymen qoldaıdy. Atom elektr stansıasynyń qurylysy otandyq bıznestiń damýyna qýatty serpin beretinine nyq senimmen aıta alamyz.

Men birneshe mańyzdy aspektilerdi qysqasha atap óteıin.

Birinshiden, AES turaqty energıamen qamtamasyz etetin negizgi kóz bolyp tabylady. Bul bıznesti damytýǵa keremet múmkindik. Ásirese, taý-ken jáne metalýrgıa, mashına jasaý, óńdeý ónerkásibi, qurylys jáne basqa da kóptegen energıany qajet etetin salalar úshin mańyzdy.

Jalpy, shaǵyn jáne orta bıznes kómirtekti beıtaraptyqty tabysty iske asyrý úshin elektr energıasyn jetkizýdi qajet etedi. Elimizge barlyq shıkizattyq emes salalardy ártaraptandyrý qajet. Birinshi kezekte – bul jańartylatyn energetıka jáne atom energetıkasy úshin taza energıanyń bazalyq generasıasyna aınalýy múmkin. Atalmysh salany qolǵa alý – bizdiń eksporttyq ónimdi satýǵa arnalǵan kómirtegi salyǵyn azaıtýǵa múmkindik beredi.

Ekinshiden, AES salý jáne paıdalaný ilespeli salalardyń damýyn yntalandyratyn ozyq tehnologıalardy, sonyń ishinde İT jáne ınovasıalyq sheshimderdi engizýdi talap etedi. Sońǵy eki jylda bizdiń mamandar Túrkıa jáne basqa da óńirlerge baryp, shaǵyn, orta jáne iri bıznestiń jańa tehnologıalarmen jumys isteýdiń qyr-syryn meńgerip keldi.

Úshinshi mańyzdy aspekt – jumys oryndaryn qurý jáne adamı resýrstardy damytýǵa baılanysty. Osy turǵyda bilim berý máselesin de aıta ketken jón. Joǵary tehnologıalardy meńgerý shaǵyn, orta jáne iri bıznestiń damýyna sózsiz serpin beredi.

Jalpy, biz bul sheshimdi qoldaımyz jáne ekonomıkamyzdyń damýyna eleýli mýltıplıkatıvtik áser beretinine senimdimiz.

«Atameken» UKP Basqarma tóraǵasy

Raıymbek Batalov