Áleýmettik jelide qazaq_robin_hood laqap atymen tanylǵan «Elge kómek» qaıyrymdylyq qorynyń jetekshisi İlıas Sarıev ustaldy.

Bul týraly zańger Nursultan Orynbekov áleýmettik jelidegi paraqshasynda jazdy.

«Qazaq Robın Gýd — İlıas Sarıev alaıaqtyq baby boıynsha ustaldy», — dep habarlady ol.

Almaty qalalyq polısıa departamenti bul aqparatty rastady. Qazirgi ýaqytta qylmystyq is qozǵalyp, tergeý amaldary júrgizilip jatyr.

«Almaly aýdandyq polısıa basqarmasyna qarasty bólimde alaıaqtyq deregi boıynsha qylmystyq is qozǵaldy. Jan-jaqty ári obektıvti tergeýge baǵyttalǵan birqatar tergeý sharalary júrgizilýde. Nátıjesinde prosesýaldyq sheshim qabyldanady»,  dep habarlady Almaty polısıa departamenti.

Buǵan deıin «Elge kómek» qaıyrymdylyq qory daýǵa ilikken bolatyn. Áleýmettik jelide qor qarjyny maqsatsyz jumsaǵany týraly aqparat tarady. Tipti jýrnalıs Gúlmıra Ábiqaıǵa birneshe adam habarlasyp, aldanyp qalǵandaryn aıtqan. Qor áleýmettik jelide «úı alyp berdik» dep esep bergenimen, shyn máninde ol úı ıesine berilmegeni aıtyldy. Alaıda qor jetekshisi İlıas Sarıev bul aqparattyń barlyǵyn joqqa shyǵarǵan edi.