ASTANA. QazAqparat - Astana tórinde dırıjer, memlekettik «Daryn» jastar syılyǵynyń laýreaty, Mádenıet salasynyń úzdigi, Qazaqstan Kompozıtorlar odaǵynyń múshesi Erkin Nurymbetovtiń shyǵarmashylyq jeke konserti tabysty ótti.
Aıta ketý kerek, Erkin Nurymbetov Qyzylorda qalasynda týyp-ósken. Almaty qalasyndaǵy Qurmanǵazy atyndaǵy konservatorıanyń túlegi, Aıtqalı Jaıymovtyń shákirtteriniń biri. Kóptegen halyqaralyq jáne respýblıkalyq konkýrstardyń laýreaty, «Dara tulǵa - Nurǵısa» atty mýzykalyq poemasy qoǵamdyq mańyzy bar shyǵarma retinde memlekettik grantty jeńip alǵan. Ol barlyq jetistikterim áýeli Allanyń, odan keıin ata-anamnyń jáne ustazdarymnyń arqasy dep esepteıdi. Mýzyka mektebindegi alǵashqy ustazy Mahambet Mámbetnazarov, Aıtbergen Jańbyrshıev, Ermurat Úsenov, al konservatorıadaǵy ustazdary Aıtqalı Jaıymov, Kenjebek Kúmisbekov, Tólepbergen Ábdirashev syndy óner sheberlerin árqashan ardaq tutady. 2001 jyldan beri Oral qalasynda turady, qazir Ǵarıfolla Qurmanǵalıev atyndaǵy Batys Qazaqstan oblystyq fılarmonıasy Dáýletkereı atyndaǵy qazaq halyq aspaptary orkestriniń kórkemdik jetekshisi jáne bas dırıjeri bolyp qyzmet atqarýda.

Qazaq handyǵynyń 550 jyldyǵyna arnalǵan «Aıbyndy Aqjaıyqtan...» atty konsertte «Kongres-Holl» saraıyna jınalǵan kórermender Qurmanǵazy, Dáýletkereı, Álshekeı, Jantóre jáne Mahambettiń kúılerin tyńdap, rýhanı qýat aldy.

Bul kúni Erkin Nurymbetov Astana qalasynyń memlekettik fılarmonıasynyń halyq aspaptar orkestrine dırıjerlik etip, ózi orkestrge arnap notaǵa túsirgen kúrdeli shyǵarmalardy tyńdaýshylar nazaryna usyndy. Sonymen qatar ózi shyǵarǵan týyndylar men ánder oryndaldy.

Orkestr Qurmanǵazynyń «Qýanysh», Dáýletkereıdiń «Bapas», Mahambettiń «Qıyl qyrǵyny», Jantóreniń «Shalqyma», Álshekeıdiń «Terisqaqpaı» kúılerin oryndap, kórermenderdiń qoshemetine bólendi.

Belgili óner ıesi, Qazaqstannyń eńbek sińirgen qaıratkeri, profesor Aıtqalı Jaıymovtyń uly, ózi de kompozıtor Arman Jaıymnyń «Qobyz ben orkestrge arnalǵan konsertin» de elordalyqtar jyly qabyl aldy. Kúrdeli de tereń maǵynaly bul týyndyny respýblıkalyq konkýrstardyń laýreaty Sadjana Myrzalıeva orkestrdiń súıemeldeýimen qobyzda sheber oryndap shyqty. Úsh bólimnen turatyn bul kólemdi shyǵarma alǵash ret oryndalýymen de erekshelendi.

Sonymen qatar orkestrdiń qoldaýymen, jeke dombyrada respýblıkalyq konkýrstardyń laýreaty Estaı Aıtqulov oryndaǵan Aıtqalı Jaıymovtyń «Otpan taý» mýzykalyq shyǵarmasyn da kórermender ystyq yqylaspen qabyl aldy. Mańǵystaý óńiriniń tarıhy men tabıǵaty, ózindik minezi men salt-dástúri, óneri men mádenıeti arqaý bolǵan týyndynyń baǵasy da joǵary ekeni anyq.

E.Nurymbetovtyń «Oralym - asyl qalam» ánin Ǵ.Qurmanǵalıev atyndaǵy BQO fılarmonıasynyń solısi, respýblıkalyq M.Tólebaev atyndaǵy vokalıster konkýrsynyń laýreaty Aıbar Haıyrhanov oryndap, astanalyqtardyń qoshemetine bólendi. Bul ánniń sózin jazǵan Asqat Maemırov.

Kelesi kezekte zalǵa jınalǵan jurtshylyq Balnur Qydyrbektiń áserli de oınaqy oryndalatyn «Qyrǵyz kúıine» shattana qol soqty.

Osy kúni kórermender E.Nurymbetovtyń «Dara tulǵa - Nurǵısa» atty mýzykalyq poemasyn da orkestrdiń oryndaýynda tyńdady. Bul keshte QR eńbek sińirgen ártisi, profesor Turar Álipbaev ta birneshe kúı tartyp berdi.

Konserttiń orta sheninde Qazaqstannyń eńbek sińirgen qaıratkeri Hatımolla Berdiǵalıev óner súıer qaýymnyń úlken qoshemetimen sahnaǵa kóterildi. Tanymal óner ıesi áýeli dombyrasyn qolyna alyp, Muhıttiń «Kishi Aıdaıyn» shyrqady. Odan keıin orkestrdiń súıemeldeýimen Tuıaqberdi Shamelovtiń Nurǵısa Tilendıevke arnalǵan «Nurǵısa aǵama saǵynysh» atty ánin oryndap berdi. Bul ánniń sózin jazǵan belgili aqyn Tumanbaı Moldaǵalıev bolatyn.

H.Berdiǵalıev kelesi kezekte Muqan Tólebaevtyń «Birjan Sara» operasynan «Estaıdyń termesin» jáne Saǵıt Sadyqovtyń «Dos ázili» ánin shyrqady.

Erkin Nurymbetovtyń shyǵarmashylyq keshi orkestrdiń oryndaýyndaǵy Qurmanǵazynyń «Saryarqa» kúıimen aıaqtaldy.

«Buǵan deıin Elordaǵa orkestrmen kelip júrmiz. Alaıda, bul meniń jeke shyǵarmashylyǵyma baılanysty Astanada ótkizip otyrǵan tuńǵysh úlken konsertim. Úlken áser aldym. Kóńilimiz ósip, halyqtyń shynaıy qoshemetine bólendik»,- dedi Erkin Nurymbetov.

Derekkóz: QazAqparat