ALMATY. QazAqparat - Sút bezi isiginiń alǵashqy kezeńindegi naýqasty emdeý memleketke 120 myń teńgege túsedi, al 4-shi kezeńde 28 mln teńge jumsalady. Bul týraly búgin Almatyda Qazaq onkologıa jáne radıologıa ǴZI-ynda ótip jatqan «Sút bezi qaterli isiginiń júıeli terapıasy» ǵylymı-praktıkalyq konferensıasy barysynda atalmysh ınstıtýt dırektory Qýanysh Nurǵazıev aıtty.
Halyqaralyq jıynǵa álemniń ár elinen 200-ge tarta delegat qatysýda.
Olardyń qatarynda densaýlyq saqtaý basqarmasynyń ókilderi, onkologıalyq dıspanser qyzmetkerleri men bas dárigerleri, onkologtar men mammologtar, hımıoterapevter, qalalyq jáne oblystyq onkodıspanser hırýrgter elimizde sút bezi qaterli isigin emdeýde tıimdi ádister men tásilderdi engizý máselelerin talqylap jatyr.
Mamandardyń aıtýynsha, DDSU-nyń málimetine sáıkes, jyl saıyn 1 mln asa áıel osy dertpen aýyrady. Oǵan qosa, mamandar bul aýrýdyń jyldan-jylǵa «jasaryp» kele jatqanyn aıtady. Al Qazaqstanda omyraý qaterli isigi onkoaýrýlar arasynda birinshi orynda, al ólim-jitim kórsetkishi boıynsha úshinshi orynda tur.
«Qazaqstanda QR Memleket basshysynyń qoldanyp otyrǵan saıasatynyń arqasynda onkologıalyq naýqastardy emdeý, dıagnostıka, sáýle emi, dári-dármek tegin ári zamanaýı ozyq tehnologıalarǵa sáıkes júrgiziledi. Elimizde jyl saıyn 4 myń áıel atalǵan keselge shaldyǵady. Bul jerde ár áıel óz densaýlyǵyna degen jaýapkershilikti sezinýi kerek. Eger ol ýaqytynda dárigerge qaralyp otyrsa, óziniń de ómirin uzartady. Alǵashqy satydaǵy naýqasty emdeýge memleket 120 myń teńge jumsaıdy. Al asqynǵan 4 satydaǵy naýqasty emdeýge 28 mln teńge jumsalady», - dedi Qýanysh Nurǵazıev.
Onyń aıtýynsha, sút bezi qaterli isigi aýrýynyń jyldan-jylǵa artýynyń sebebi tek dıagnostıkalyq faktordyń jaqsarǵanyna ǵana baılanysty emes.
«Qazirgi áıelderdiń ómir súrý salty ózgergen. Burynǵydaı kóp júktilik joq. Balany býyny bekigenshe emizbeıdi. Qanshama abort jasalyp jatyr. Bul da sút bezi qaterli isiginiń damýynyń bir faktory», - dedi Q.Nurǵazıev.
Aıta ketý kerek, qazan aıy búkilálemdik sút bezi qaterli isigimen kúres aıy dep ataldy. Atalǵan aılyqqa baılanysty álemniń ár túkpirinde keselge qarsy kúreske qatysty túrli sharalar ótip jatyr.
1 qazannan bastap Astanada «Báıterek» monýmenti, «Tulpar» kópiri, Almatyda Balýan Sholaq atyndaǵy sport saraıy keshke qaraı jaryq arqyly kúlgin túske boıalady. Kúlgin tús - qaterli isikke qarsy kúres qozǵalysynyń sımvoly. Osylaısha otandyq mammolog mamandar áıelder men qyzdardyń nazaryn qaterli isikpen kúresýge, onyń aldyn alýǵa, der kezinde emdelýge shaqyrýdy maqsat tutyp otyr.
Bul aksıa qazannyń sońyna deıin jalǵasady. Mundaı aksıa Reseıde, Ýkraınada da ótip jatyr.
Derekkóz: QazAqparat
