ORAL. QazAqparat - Men elimizdegi patrıottardyń basyn qosqan «Máńgilik El - bolashaǵy birtutas el» forýmyna qatysqanyma óte qýanyshtymyn. Koreı halqynyń ókilderi úshin «Men qazaqstandyqpyn» degen sóz erekshe jaqyn ári ystyq. Óıtkeni koreıler Qazaqstanǵa jer aýdarylyp kelgende, bizdi baýyryna basyp, qushaǵyna alǵan qazaq halqy bolatyn. Biz muny eshqashan umytpaımyz. Dál osyny Oral qalasynda koreı dıasporasynyń qarajatyna boı kótergen «Qazaq halqyna myń alǵys» monýmenti aıǵaqtap, barsha elge pash etip tur. Bul týraly Astanada ótken el patrıottarynyń forýmyna qatysyp qaıtqan BQO koreı etnomádenı qoǵamdyq birlestiginiń tóraǵasy Maksım Pak málim etti.
Onyń aıtýynsha, Qazaqstan halqy Assambleıasy qyzmetine aralasqannan beri Elbasy Nursultan Nazarbaevpen birneshe ret kezdesip, sózin tyńdaǵan. Memleket basshysy QHA sesıalarynda eldi birigýge úndep, ortaq maqsatqa jumyldyra bildi. Bizdiń búgingi tabystarymyz ben jeńisterimizdiń bári - Elbasy júrgizip otyrǵan saıasattyń arqasy.
El patrıoty, Qazaqstan halqy Assambleıasynyń múshesi retinde ortaq úıimiz - Qazaqstannyń odan ári gúldenip, qarqyndy damýyna barynsha úles qosyp kelemiz. Biz ár eldi mekende, mektepte etnomádenı birlestikterdiń qatysýymen jastardy otanshyldyq rýhta tárbıeleýge atsalysýdamyz. Atalmysh forýmda ǵaryshker Aıdyn Aıymbetov bıyl jazda sýǵa batyp bara jatqan qos birdeı qyzdy qutqaryp qalǵany úshin «Jyl patrıoty» atanǵan batysqazaqstandyq oqýshy Nıkıta Túkınge «Erligi úshin» atalymyn tabys etti. Osy sátte biz jas jetkinshekterimizdiń osylaısha, ata-babanyń erlik dástúrine saı ósip kele jatqanyn sezinip, kóńilimiz aspandaı tústi.
«Koreı etnomádenı birlestigi oblysta áleýmettik jobalardy júzege asyryp keledi. Munyń kópshiligi qaıyrymdylyq pen múmkindigi shekteýli jandarǵa kómek kórsetýge arnalǵan. Aıtalyq, «20 izgi is» aıasynda «Arba» qoǵamdyq birlestigimen birlesip arbada otyratyn múgedekterge tegin dárigerlik járdem berýdi kózdeıtin «Keleshekke kózqaras» jobasy júzege asyrylýda. Qazirgi kezde atalmysh qoǵamdyq birlestik ǵımaratynda múgedekterge arnalǵan sylaý kabıneti jumys jasaıdy. Árıne, izgi ister QHA jylymen shektelmeıdi. Ol aldaǵy ýaqytta da jalǵasady. «Máńgilik elge» aınalý úshin «Nurly jol» baǵdarlamasyna sáıkes ortaq Otanymyzdyń týyn kóterip, bir-birimizge dem berip, jarqyn bolashaqqa qol sozý - barshamyzdyń paryzymyz», dep túıindedi oıyn M.Pak.
"Qamshy" silteıdi
Derekkóz: QazAqparat
