ALMATY. QazAqparat - Búgin Almatyda «Nemis ınvestısıasynyń Qazaqstanǵa kelýi - múmkindikter men kedergiler» taqyrybynda 17-shi Germanıa ekonomıkasynyń Kúni bastaldy.
Osy shara aıasynda uıymdastyrylǵan halyqaralyq konferensıaǵa Almaty qalasynyń ákimi Baýyrjan Baıbek, QR Investısıalar jáne damý vıse-mınıstri Albert Raý, Germanıa Federatıvtik Respýblıkasy Parlametiniń depýtaty Hartmýt Koshyk, Qazaqstan men Germanıa arasyndaǵy birlesken kásiporyndardyń basshylary jáne basqa da múddeli tulǵalar qatysty.
Óz sózinde Almaty qalasynyń ákimi Baýyrjan Baıbek kezinde óziniń Germanıada oqyǵandyǵyn, sondyqtan osy elden kelgen qonaqtarmen kezdeskenine qýanyshty ekendigin bildirip, osy múmkinshilikti paıdalanyp baıandamasynyń bir bóligin nemis tilinde oqydy.
«Qazaqstan men Germanıa arasyndaǵy saýda-ekonomıkalyq baılanys búginde nyǵaıyp keledi. Bul jerde Almaty qalasynyń alar orny erekshe. Almaty men Germanıa arasyndaǵy yntymaqtastyq joǵary qarqynmen damyp jatyr. Búgingi tańda Almatyda 195 birlesken kásiporyn jáne nemis kapıtalynyń qatysýymen 200 kásiporyn tabysty jumys istep keledi. Iaǵnı, Qazaqstanda eki el kapıtalynyń birlesýimen qurylǵan kompanıalardyń 60 paıyzy Almatyda shoǵyrlanǵan. Bul qýanarlyq jaǵdaı. Bul qarym-qatynastyń aldaǵy ýaqytta da damı túsetindigine jáne germanıalyq ınvestorlardyń Almatyda ekonomıkanyń basymdy baǵyttary boıynsha qolǵa alynatyn iri jobalarǵa belsendi túrde qatysatyndyǵyna senimimiz mol», - dedi B. Baıbek.
Búgingi konferensıa barysynda eki jaqty yntymaqtastyqty jaqsartý múmkindikteri jáne bolashaq jobalardy qolǵa alý máseleleri talqylandy.
Aıta ketelik, qazirgi tańda Qazaqstanda barlyǵy 350-den astam nemis kásiporny qyzmet atqarady. Olar ınfraqurylymdardy damytý, saýda, qurylys jáne basqa da salalarda jemisti eńbek etip keledi.
Konferensıa jumysy odan ári jalǵasýda.
Derekkóz. QazAqparat
