ALMATY. QazAqparat - Búgin Almatyda dástúrli «Jolda qabyldaý» respýblıkalyq aldyn alý aksıasy bastaldy. Ol ár úsh aı saıyn ótip turady.
«Bul sharanyń maqsaty - azamattarymyzdyń ár túrli sala boıynsha quqyqtyq saýattalyǵyn arttyrý. Sol úshin búgin osy aksıa aıasynda Almaty qalasy boıynsha bes mýnısıpaldyq avtobýs halyq kóp shoǵyrlanatyn jerlerge qoıyldy. Árbir avtobýsta jol polısıasynyń ókili, jergilikti ýchaskelik ınspektor, zańger, «Nur Otan» partıasynyń Almaty qalalyq fılıaly men aýdandyq ákimdiktiń ókilderi jáne jańa elektrondy bılettendirý júıesi boıynsha maman jumys isteıdi. Olar ózderine qatysty qandaı da bir máselemen kelgen azamattardyń suraqtaryna jan-jaqty jaýap beredi. Eger jaýap bere almasaq, onda suraqty jazyp alyp, keıin jaýap daıyn bolǵan soń, ony azamatqa telefon arqyly nemese «Nur Otan» partıasynyń Almaty qalalyq fılıalynyń qoǵamdyq qabyldaýyna shaqyryp aıtatyn bolamyz», - dedi óz sózinde «Nur Otan» partıasy Almaty qalalyq fılıalynyń Qoǵamdyq qabyldaý bóliminiń meńgerýshisi Nurlanbek Ájibaev.
Sonymen qatar, ol azamattardyń mamandarǵa kóp jaǵdaıda quqyqtyq máseleler boıynsha júginetindigin jetkizdi.
«Eger tájirıbege súıenip aıtar bolsaq, azamattar kóbinese quqyqtyq máseleler boıynsha júginedi. Mysaly, jol-kólik apaty, jol qozǵalysy erejesiniń buzylýy, jer, páter jáne sot máselesi boıynsha suraqtar qoıady. Bizde eshqandaı saýal jaýapsyz qalmaıdy», - dedi N. Ájibaev.
Aıta ketelik, buǵan deıin ótkizilgen aksıa barysynda Almaty qalasynyń úsh aýdany qamtylǵan bolatyn. Bul joly barlyq segiz aýdan qamtylyp otyr. Osy maqsatta bes mýnısıpaldyq avtobýs syrtyna «Jolda qabyldaý» dep jazylǵan aqparattyq plakatpen rásimdeldi. Olardyń biri Áýezov jáne Alataý aýdandary boıynsha - «Magným» saýda úıiniń mańyna, ekinshi avtobýs Bostandyq aýdany boıynsha - «Atakent» iskerli ortalyǵy, úshinshi avtobýs Jetisý aýdany boıynsha «Adem» saýda úıi, tórtinshi avtobýs Medeý jáne Almaly aýdandary boıynsha Pýshkın men Maqataev kósheleriniń qıylysyna jáne besinshi avtobýs Naýryzbaı aýdany ákimdiginiń mańyna qoıyldy. Shara búgin keshki saǵat 17:30-ǵa deıin jalǵasady.
Uıymdastyrýshylardyń aıtýynsha, búgin keshke qaraı 1000-nan asa adam «Joldaý qabyldaý» aksıasyna qatysady de kútilýde. Al jyl basynan beri Almatyda 3000-nan astam adam júgingen.
Derekkóz. Qazaqparat
