ASTANA. QazAqparat - Ulttyq atom kompanıasynyń basshysy Ońtústik Qazaqstan oblysynda boldy, dep habarlaıdy «Qazatomónerkásip» UAK» AQ baspasóz qyzmetinen.
Sapar aıasynda «Qazatomónerkásip» UAK» AQ basqarma tóraǵasy Asqar Jumaǵalıev Ońtústik Qazaqstan oblysynyń ákimi Beıbit Atamqulovpen kezdesip, ekijaqty yntymaqtastyqtyń birqatar máselelerin sóz etti. Kezdesýde «Qazatomónerkásiptiń» enshiles kásiporyndarynyń qonys aýdarýyna aıryqsha mán berildi.

«Qazatomónerkásiptiń» óndirýshi kásiporyndary keńseleriniń kóshýi Memleket basshysynyń tapsyrmasy sheńberinde iske asyrylýda. Keńselerdiń qonys aýdarýy aımaqtyń áleýmettik-ekonomıkalyq damýyna oń serpin beredi jáne kásiporyndardyń jumys tıimdiligin arttyrady dep kútilýde.

«Ortalyq» ÓK» JSHS jáne «Inkaı» BK» JSHS-niń ortalyq apparattary alǵashqylar qatarynda Ońtústik Qazaqstan oblysyna kóship ótti. Aı sońyna deıin «Áppaq» JSHS, «Qarataý» JSHS, «Aqbastaý» BK» AQ jáne «Zarechnoe» BK» AQ bas keńseleri kóshýdi aıaqtaıdy. 2015 jyly Shymkentke atom kompanıasynyń 8 enshiles kásiporny qonys aýdaratyn bolady.

Asqar Jumaǵalıev osy kósh barysynda kásiporyndarǵa kórsetip otyrǵan qoldaýy úshin oblys ákimine alǵysyn bildirip, «Qazatomónerkásip» aımaqtyń áleýmettik-ekonomıkalyq damýyna belsene qatysatynyn atap kórsetti.

Ulttyq atom kompanıasynyń basqarma tóraǵasy memorandýmda bekitilgen jergilikti úleske qatysty mindettemeniń 128% oryndalǵanyn habarlady. «Qazatomónerkásip» jergilikti kásipkerler men taýar óndirýshilerden 5,9 mlrd teńgege ónim satyp aldy.

Sondaı-aq aımaqty áleýmettik-ekonomıkalyq damytý memorandýmyna sáıkes jyl sońyna deıin kompanıa 12 áleýmettik nysandy ákimdikke ótkizýdi jáne olardy ustap turýǵa bıyl qosymsha 88 mln teńge bólýdi kózdep otyr. Sonymen birge «Qazatomónerkásip» jańa áleýmettik nysandar qurylysy úshin oblys búdjetine 800 mln teńge bóledi. 

Kompanıa munymen shektelmeı, ýran óndirýshi óńirge qoldaý kórsetýdi jalǵastyra bermek. Atap aıtqanda, osy qazan aıynda «Qazatomónerkásiptiń» enshiles kásiporny qarjysyna salynyp jatqan Sozaq aýdanynyń Tasty aýlyndaǵy 50 oryndyq balabaqsha qurylysy aıaqtalady.

Sapar aıasynda Asqar Jumaǵalıev ýran kenishterin, Shymkentke kóship ótken enshiles jáne baǵynyshty kásiporyndardyń ákimshilik keńselerin aralap, kásiporyndardyń aǵymdaǵy qyzmetine qatysty jer-jerde keńester ótkizdi.

Derekkóz. qazAqparat