KÓKSHETAÝ. QazAqparat - Orazaq aýylynda paıdalanýǵa berilgen úılerdiń sany 46 jetip, ázirge barlyǵy 92 otbasy páterler ıelendi. Bul týraly búgin oblys ákimi Sergeı Kýlagınniń óńirge sapary barysynda belgili boldy.
Bul osy aýylda tabıǵat apatynan baspanasyz qalǵandarǵa salynyp jatqan eki páterli 100 úıdiń jartysyna jýyǵy. Qazirgi kezde qalǵan úılerdiń qurylysy qyzý júrgizilýde. 

Sonymen qatar tasqyn sýdan zardap shekken turǵyndar úshin Aqmol jáne Qosshy aýyldarynda da eki-ekiden 45 páterli turǵyn úıdiń qurylysy júrgizilip jatyr.

Aýdanǵa jumys saparymen barǵan oblys ákimi Sergeı Kýlagın atalǵan úılerdiń qurylysyna nazar aýdaryp, jumysta shıratýdy tapsyrdy.

«Kún sýytyp barady. Sondyqtan ýaqyt tyǵyz, jumysty shıratýymyz kerek. Buǵan turǵyndar da qarap otyrmaı qolǵabys jasaǵany abzal. Qosymsha jumys kúshi retinde 50 kýrsantty tartyp otyrmyz. Ázirge 46 úıdi paıdalanýǵa berdik. Bul 92 otbasy páterli boldy degen sóz. Al qalǵan úıler qarashanyń 15-ine deıin tolyq berilýi kerek», - dep atap ótti oblys ákimi.

Eske sala ketsek, bıylǵy jylǵy kóktemgi sý tasqynynan Aqmola oblysyndaǵy birqatar eldi mekendi sý shaıyp ketip, halyqty biraz ábigerge salǵany belgili. Sonyń ishinde Selınograd aýdany eń kóp zardap shekti. Aýdan boıynsha barlyǵy 300-ge jýyq baspana jaramsyz bolyp qalsa, onyń 200-i - Orazaq aýylyndaǵy úıler. Aǵymdaǵy jyldyń 15 qyrkúıek kúni tasqyn sýdan eń kóp zardap shekken Orazaq aýylynda 20 úı paıdalanýǵa berilip, 40 otbasy páterli bolǵan edi.  

Derekkóz: Qazaqparat