ORAL. QazAqparat - Búgin Oral qalasyndaǵy Saltanat saraıynda «Paryz» pikirtalas klýbynyń kóshpeli otyrysy bolyp, onda «Máńgilik el - asyl muratymyz» degen taqyrypta ult zıalylarynyń Qazaqstandaǵy turaqtylyqty saqtaý, el birligin ornyqtyrý baǵytyndaǵy usynys-pikirleri ortaǵa saldy.
Qoǵam qaıratkeri, saıasattanýshy, atalmysh klýb jetekshisiniń orynbasary Dos Kóshimniń aıtýynsha, bıylǵy qyrkúıekte Mádenıet jáne sport mınıstrligi Tilderdi damytý jáne qoǵamdyq-saıası jumys komıtetiniń tapsyrysymen Almaty qalasynda ult zıalylarynan quralǵan «Paryz» pikirtalas klýby óz jumysyn bastady. Mundaǵy maqsat - ult zıalylaryn saıası-ıdeologıalyq máselelerge tartý, olardyń «100 naqty qadam» Ult jospary men «Máńgilik elge» qatysty oı-tolǵamdaryn bilý, sonyń nátıjesinde naqty bastamalar kóterý. Zıalylar kóbine rýhanı-mádenı jaǵynan kórinedi de, saıası máselege kelgende, báseńsip qalady, keıde tipti qashqaqtap júredi. Shyn mánisinde zıalynyń aty zıaly. Olardyń bilim-biligi, tájirıbesi mol. Saıyp kelgende, zıaly memleket pen bılik arasyndaǵy kópir bola alady. Sebebi qazaq túbinde zıalylaryn tyńdaıdy. Olar memlekettik qyzmetker emes, sondyqtan óz pikirin ashyq aıta alady. Olardyń saıası deńgeıi men belsendiligi joǵary bolsa, bul memleket úshin de paıdaly. «Paryz» pikirtalas klýby osyǵan deıin birneshe oblysta kezdesýlerin ótkizdi, qozǵaǵan taqyryby da ár alýan  boldy. Mysaly, Petropavlda birtektilik máselesi talqyǵa salyndy. Iaǵnı qazaq halqynyń bir bolýynyń negizi nede, birtektilik kerek pe? degen saýaldarǵa  jaýap izdeldi. Tipti birtektilik durys emes degen syndar da aıtyldy. Sol sekildi Qyzylordada ult jáne memlekettik ult máselesi tóńireginde sóz qozǵaldy. Oraldaǵy basqosý da - ortaq maqsattan týyndap otyrǵan áńgimelerdiń zańdy jalǵasy. Eń bastysy, qundy pikirler jerde qalmaı, jınaqtalyp, tıisti nátıje shyǵatyn bolady.

Jıynda sondaı-aq fılosof, pýblısıs, klýb otyrysynyń hatshysy Ábdiráshıd Bákiruly qazirgi tańda ıdeologıalyq máselelerdiń burynǵydan da ótkirlene túskenin, sondyqtan olardy birigip sheshýdiń mańyzdylyǵyn atap kórsetti.

Aqyndar, Qazaqstan Jazýshylar odaǵynyń músheleri Aqushtap Baqtygereeva, Aısulý Qadyrbaeva, Ǵaısaǵalı Seıtaq, ǵalymdar Oleg Iýrov, Abat Qydyrshaev, Jańabek Jaqsyǵalıev, Vladımır Salov jáne basqalar eldiń birligi men bolashaǵyn nyqtaý úshin aldymen onyń ıdeologıasyn jóndep alý, ulttyq memleket qalyptastyrý, alaýyzdyqtan aýlaq bolyp, qazaq halqynyń múddesi úshin birigý, memlekettik tildiń mańyzyn arttyrý týraly oılarymen bólisti.

Derekkóz: QazAqparat