ATYRAÝ. QazAqparat - Atyraý oblysynda ındýstrıalyq-ınnovasıalyq damytý baǵdarlamasynyń aıasynda 76 mıllıard teńgege 33 joba júzege asyrylyp jatyr.
Bul týraly Ortalyq komýnıkasıalar qyzmetiniń Atyraý fılıalynda ótken brıfıń barysynda oblystyq ákimdiktiń Kásipkerlik jáne ındýstrıalyq-ınnovasıalyq damý basqarmasynyń basshysy Larısa Jumaǵalıeva málim etti, dep habarlaıdy QazAqparattyń Atyraý oblysyndaǵy tilshisi A. Sokolov.

«Atyraý oblysy 2015 jyldan munaı-gaz ónerkásibine arnalǵan servıstik qyzmetter boıynsha ulttyq klasteriniń ortalyǵy bolyp Atyraý qalasynyń belgilengen. Atalǵan baǵdarlamany júzege asyrý úshin myńdaǵan jumyskerler men mamandar tartylmaqshy. Bir ǵana «Teńizshevroıl» JSHS úshinshi býyn zaýytynyń qurylysy barysynda 20 myńǵa jýyq jańa jumys orny ashylmaq, al zaýyt paıdalanýǵa berilgen kezde 500 qyzmetkerdi jumysqa alady», - dedi basqarma basshysy.

L. Jumaǵalıevanyń aıtýyna qaraǵanda, oblysta ındýstrıalyq-ınnovasıalyq damytý baǵdarlamasynyń aıasynda 76 mıllıard teńgege 33 joba júzege asyrylyp jatyr. Búgingi kúni ekonomıkanyń túrli salalarynda 2,5 myń jańa jumys orny ashylǵan.

«Ótken jylmen salystyrǵanda shaǵyn jáne orta bıznes bir paıyzǵa ósip, halyqty jumyspen qamtý 5,6 paıyzǵa ulǵaıǵan. Kásipkerler arasynda «Bıznestiń jol kartasy-2020» baǵdarlamasy úlken suranysqa ıe. Sondaı-aq aýyldaǵy kásipkerlerge oblystyq búdjetten de qarajat bólinýde», - dedi oblystyq ákimdiktiń Kásipkerlik jáne ındýstrıalyq-ınnovasıalyq damý basqarmasynyń basshysy Larısa Jumaǵalıva.

Aldaǵy ýaqyttary Atyraý oblysynda áıelder arasyndaǵy kásipkerlik qarjylandyrylmaq. Bul úshin Azıa damý banki bir mıllıard dollar bólgen.

Aımaqta «Bıznestiń jol kartasy - 2020» baǵdarlamasyn júzege asyrý da  jalǵasyp jatyr. Bul baǵdarlamaǵa respýblıkalyq búdjetten úsh baǵyt boıynsha 1 mlrd. 227 mln. teńge qarajat bólindi. Bul baǵdarlama oblysta sátti júzege asyrylýda.

Derekkóz. QazAqparat