TALDYQORǴAN. QazAqparat - Taldyqorǵan qalasynyń ákimi Ermek Alpysov jolaýshylar tasymaly kásiporyndarynyń basshylarymen jınalys ótkizdi.
Kezdesý barysynda sala boıynsha birqatar máseleler, onyń ishinde qoǵamdyq kólik qyzmetiniń sapasy, kólikterdiń jaǵdaıy men salany ary qaraı damytý talqylandy.

Qala basshysy jınalystyń basynda marshrýttyq avtobýstardyń jumysyndaǵy birqatar  kemshilikterdi atap ótti. Mysaly,  170 avtobýstyń 90 kondýktory ǵana bar. Sondaı-aq jolaýshylarǵa bıletter berilmegen, bundaı buzýshylyq 50 avtobýsta oryn alǵan. Sonymen birge qoǵamdyq kólikterdiń sanıtarlyq jaǵdaıy da  sóz boldy.

Qala ákimi bul jolaýshylar tasymaly kásiporyndarynyń basty máseleleri bolyp tabylatynyn atap ótip, tez arada avtoparkti tártipke keltirýdi tapsyrdy. Ermek Alpysov avtobýstarda ornatylǵan aqparattyq taqtaıshalardy da aıtyp ótti. Inspeksıanyń habarlaýynsha, olardyń birqatarynda aqparat memlekettik tilde jazylmaǵan, bul zańnamaǵa qaıshy bolyp keledi. Ákim joǵaryda atalǵan olqylyqtar 25 qazanǵa deıin joıylyp, avtobýstardyń qys mezgiline daıyn bolý qajettigin eskertti.

Kóptegen kemshiliktermen birge qala basshysy jetistikterdi de aıtyp ótti. Kóptegen kásiporyndarda avtobýs parki jańartylyp, qyzmet kórsetý sapasy jaqsarǵan. Sonymen birge ákim elektrondy bılet júıesin engizýdi usyndy.  Ákimniń bul usynysyn jolaýshylar tasymaly kásiporyndarynyń basshylary qoldady. Sóz sońynda qala ákimi Jolaýshylar tasymaldaý basqarmasy ortalyǵynyń dırektoryna bul máseleni jan-jaqty zerdelep, usynys engizýdi tapsyrdy.

Derekkóz: QazAqparat