ALMATY. QazAqparat - Almaty ákimi Baýyrjan Baıbek Bostandyq aýdanyn aralady. 
Baýyrjan Baıbek eń aldymen úleskerlerdiń basty problemasyna aınalǵan  «Taý Kóktem»  turǵyn kesheninde boldy. Nysannyń qurylysy 2011 jyly toqtap qalǵan bolatyn. Sonyń kesirinen 60 úlesker páterine kire almaı júr.

Qala ákimi qurylys kompanıasyna tez arada jumysty aıaqtaýǵa tapsyrma berdi. Olar nysannyń 2016 jyldyń shildesinde paıdalanýǵa beriletinine ýáde berdi.

Tekserý komısıasynyń músheleri qurylys der ýaqytynda aıaqtalmasa jer tartyp alynatynyn eskertti. 

«Memlekettiń saıasaty bar, QR Prezıdentiniń tıisti tapsyrmalary bar. Bul máseleni  sheshińder jáne 25 qazanǵa deıin maǵan nysan týraly naqtyly usynys aıtyńdar, balama varıantty da qarastyryńdar», - dep atap ótti  B.Baıbek. 

Qala basshysy Zvezdnaıa kóshesiniń shyǵysyndaǵy «Alataý» yqsham aýdanyn  abattandyrýdy  qolǵa alý kerektigin jetkizdi.

Atalǵan aımaqta órt sóndirý bólimi, AİİB pýnkti, bazar men «Etno-aýyl» saıabaǵy,  kıizden buıym jasaıtyn sheberhanalar, kúmisten jasalǵan buıymdardyń kórmesi jáne basqa ulttyq nyshandy nasıhattaıtyn jańa oryndar qurý týraly usynys aıtyldy.   

«Bul jerde qandaı nysandardy salýǵa bolatyndyǵy jóninde joba  jasap, máseleni sheshý qajet. Sheberhanalar ashyp, adamdarǵa aqsha tabýǵa múmkindik berý kerek, bizdiń etnıkalyq mádenıetimizdi nasıhattaǵan jón. Aldymyzda Ýnıversıada kútip tur, sondyqtan bul jer adamdar jıi  keletin orynǵa aınalýy tıis», -  dep atap ótti  B.Baıbek.  

Shahar basshysy Aqsaı ózeninde selge qarsy qondyrǵy ornatýdy tapsyrdy. Bul ózenniń arnasynda kúrdeli jóndeý jumystary sonaý 1973 jyldan beri júrgizilmegen.  

«Kóshpeli búdjetti jasap, ony bıyl  engizý qajet. Sonymen qatar selden qorǵaıtyn qondyrǵylar jobasyn da jasaý  kerek, bul máseleni  depýtattardyń qaraýyna usynǵan jón», - dep atap ótti B.Baıbek. 

Sondaı-aq, ákim «Atakent» kórme keshenin kúrdeli jóndeýden ótkizýdi usyndy.   Kórme kesheni aýmaǵynda sport alańdary, medısınalyq ortalyq,Tımırázev kóshesi boıynda jer asty garajdary paıda bolady.

Derekkóz. Qazaqparat