ALMATY. QazAqparat -  Almaty ákimi Baýyrjan Baıbek Múmkindigi shekteýli jandar kúni qarsańynda múgedekter máselelerimen aınalysatyn úkimettik emes uıymdardyń basshylarymen kezdesti. 
Qala basshysy Almatyda erekshe kútimdi qajet etetin jandarǵa  áleýmettik qoldaý kórsetý úshin jyl saıyn jergilikti búdjetten 3 mlrd. teńgege jýyq qarjy bólinetindigin aıtty.

Onyń aıtýynsha, áleýmettik qyzmetkerler árbir 43 myń múgedektiń suranysyn anyqtap, jeke dara kómek kórsetip keledi. Múmkindigi shekteýli myńnan astam balaǵa arnaıy áleýmettik qyzmet úıde  kórsetiledi, 5 myńnan astam múgedek  medısınalyq-áleýmettik mekemelerde jáne kúndizgi ortalyqtarda emdeledi. 

Ákim qalanyń barlyq kólik túrlerinde múmkindigi shekteýli jandarǵa qolaıly jaǵdaıdyń jasalǵandyǵyn atap ótti. Avtobýstardyń teń jartysyna qozǵalysy shekteýli adamdarǵa arnalǵan qondyrǵylar ornatylǵan.   Onyń ústine bul kólikter ekologıalyq jaǵynan taza.   

«Qaladaǵy  ınfraqurylymdar múmkindigi shekteýli jandar úshin qol  jetimdi bolýy tıis, ásirese ǵımarattar, joldardyń qurylysy kezinde, qoǵamdyq kólikterde basa eskerý kerek»,  - dedi Baýyrjan Baıbek. 

Ákim  múmkindigi shekteýli jandarǵa áleýmettik  kómek pen qoldaý kórsetý jónindegi jobalardy  júzege asyrýǵa memlekettiń, qoǵamdyq uıymdar men jeke sektordyń birigip qatysýy mańyzdy ekenindigin  jetkizdi. 

«Búgingi kúni Almatyda shamamen 23 myń múgedek jumys isteýge qabiletti dep sanalady. Olardyń ishinde 6000 adam  eńbekpen qamtylǵan. Múmkindigi shekteýli jandardy jumyspen qamtý «Jumyspen qamtýdyń jol kartasy 2020» jáne « Qalanyń damý baǵdarlamasy» jobalary, bos jumys oryndarynyń arnaıy jármeńkelerin ótkizý arqyly júzege asýda»,  - dep atap ótti  Baýyrjan Baıbek. 

Kezdesý barysynda qala ákimi «Qazaq soqyrlar qoǵamy» qoǵamdyq birlestigi Almaty  fılıalynyń tóraıymy Nına Jýkovskaıaǵa, Túrksib aýdany «Múgedekterdiń erikti qoǵamy» basqarmasynyń tóraǵasy Kenjebaı Qudaıbergenovke jáne «Men seni súıemin, ómir» qoǵamdyq qorynyń quryltaıshysy Merýert Súleımenovaǵa Qurmet gramotalaryn tapsyrdy. 

Derekkóz: Qazaqparat