TARAZ. QazAqparat - Jambyl oblysynyń qylmystyq ister boıynsha mamandandyrylǵan aýdanaralyq sotynda 4 jasar balany zorlap, óltirgeni úshin aıyptalǵan T.İzbaqıevke qatysty qylmystyq isti qaraý aıaqtalyp, sot úkimi shyqty. Bul týraly oblystyq prokýratýranyń baspasóz qyzmetinen habarlady.
«Almaty oblysynyń týmasy, Merki aýdanyndaǵy Aqermen aýylynda turǵan Qyrǵyzstan Respýblıkasynyń 55 jastaǵy azamaty Tursynjan İzbaqıev balaǵa qarsy asa aýyr qylmys jasaǵan: 2015 jyldyń 16 mamyrynda kúndiz İzbaqıev T. balalardyń oıyn alańynda jalǵyz ózi oınap júrgen, kórshi turatyn 4 jasar O.esimdi balanyń qasyna baryp, onyń álsizdigi men qasynda eshkimniń joq ekenin paıdalanyp, qolymen balanyń betinen bir soǵyp, esinen tandyrǵan. Odan keıin balany óz úıine ákelip, búldirshinge qatysty seksýaldyq sıpattaǵy zorlaý áreketterin jasaǵan», - delingen qadaǵalaý organy baspasóz qyzmetiniń resmı habarlamasynda.

«Odan keıin İzbaqıev T. qylmysyn jasyrý maqsatymen kishkentaı O-ny óltirýdi sheshken. Sol úshin oń jaq qolymen balanyń tynys alý joldaryn jaýyp, tunshyqtyryp óltirdi. Jasaǵan qylmysyn túsingen İzbaqıev kishkentaı balanyń denesin aýlasynda turǵan jumys istemeıtin tońazytqyshqa jasyrǵan. Balanyń múrdesi bir aıdan soń tabyldy», - dep habarlaıdy oblystyq prokýratýranyń baspasóz qyzmetinen.

Qylmystyń qoǵamda úlken shý shyǵarǵanyna baılanysty İzbaqıevqa qatysty qylmystyq isti Jambyl oblysynyń prokýratýrasy tergedi.

Memlekettik aıyptaýshynyń usynysy qoldanyp, İzbaqıev QR QK-niń 121-babynyń 4-bólimi (kámelettik jasqa jetpegenge qatysty seksýaldyq sıpattaǵy zorlaý áreketterin jasaý), 99-baptyń 2-bólimi (qylmysty jasyrý úshin, álsiz jaǵdaıda bolǵan adamdy óltirý) boıynsha Jambyl oblystyq qylmystyq ister boıynsha mamandandyrylǵan aýdanaralyq sotynyń úkimimen tolyqtaı aıypty dep tanylyp, ómir boıy bas bostandyǵynan aıyrý jazasyna kesildi.

Proses jabyq sot otyrysynda ótti. 

Derekkóz: QazAqparat