ALMATY. QazAqparat - Búgin Almatyda «Aqtaý deklarasıasy: Sınergıa jáne oqshaýlaý» atty halyqaralyq forým ótti. Oǵan mashına jasaý jáne ınjınırıń salasynda qyzmet atqaratyn 70 qazaqstandyq kásiporyn men 30 sheteldik óndirýshiler, sondaı-aq, QR Energetıka mınıstrligi men Investısıa jáne damý mınıstrliginiń ókilderi qatysty.
«Qazaqstandyq kásiporyndardy munaı jáne gaz salasyna tartý jáne qazaqstandyq úlesti arttyrý arqyly otandyq ındýstrıany damytý - elimizdiń basymdy mindetteriniń biri. Bul forýmnyń basty maqsaty - qazaqstandyq kásiporyndardy osy saladaǵy irikteý jáne tender júıesimen tanystyrý. Bular qazirgi tańda ár túrli korporatıvtik rásimderge negizdelgen. Al bul otandyq óndirýshiler úshin kóptegen qıyndyqtar týdyrady. Osy máseleni sheshý qajet», - dedi «KAZENERGY» qazaqstandyq munaı-gaz jáne energetıka kesheni uıymdarynyń qaýymdastyǵy» ZTB bas dırektory Áset Maǵaýov.
Ol sonymen qatar óz sózinde osydan úsh jyl buryn qol qoıylǵan Aqtaý deklarasıasy aıasynda iri operatorlar, ınvestorlar men memlekettik mekemeler óz moıyndaryna ózara tájirıbe jáne maǵlumattar almasý, turaqty oqshaýlaý úderisi men jergilikti mazmundy arttyrý strategıasyn qalyptastyrý mindetin alǵandyǵyn aıtty.
«Ústimizdegi jyldyń birinshi qyrkúıegine qaraı qazaqstandyq óndirýshilerdiń taýarlary men kórsetetin qyzmetterin satyp alý týraly kelisimsharttardyń jalpy somasy bir trıllıon teńgeden asyp ketti. Jyl sońyna qaraı bul somanyń kólemi arta túsetin bolady», - dedi «QazMunaıGaz» UK» AQ bıznesti qoldaý boıynsha basqarýshy dırektory Serik Keýlimjaev.
Onyń aıtýynsha, otandyq óndirýshilermen uzaq merzimdi kelisimsharttar jasasý - DSU sheńberinde básekelestikti boldyrmaýǵa jáne olarǵa óz qyzmetterin josparlaýǵa, óndiristi jańartýǵa múmkindik beredi.
«1993 jyldan beri «Teńizshevroıl» kompanıasy kúni búginge deıin 19,1 mlrd. dollarǵa qazaqstandyq taýarlar men kórsetiletin qyzmetterdi satyp alǵan. 2013 jyldyń sońynda biz QR Úkimetimen ózara túsinistik, ınvestısıany arttyrý, bilim berý jáne jumyspen qamtý boıynsha memorandýmǵa qol qoıǵanbyz. Bolashaqta óndiristi keńeıtý jáne basqarý jobalary aıasynda bizde 20 myńǵa jýyq jańa jumys oryndary ashylatyn bolady», - dedi «Teńizshevroıl» JSHS Bas dırektory Tom Mıller.
Sonymen qatar, forým barysynda «Qarashyǵanaq», «Teńiz» jáne «Qashaǵan» jobalary boıynsha kadr, taýar óndirý jáne qyzmet kórsetý máseleleri talqylandy.
Odan basqa, Eýropa qaıta qurý jáne damý banki men birqatar otandyq jáne shet eldik kompanıalar arasynda yntymaqtastyq týraly memorandýmǵa qol qoıyldy.
Derekkóz: QazAqparat
